Ак-Талаада авариялык абалдагы мектептин ордуна жаңысы курулууда
Ак-Талаа районунун Чолок-Кайың айылындагы Б.Календеров атындагы 275 орундуу мектептин курулушу уланууда. Бул тууралуу Архитектура, курулуш жана турак жай-коммуналдык чарба мамлекеттик агенттигинен билдиришти.
Маалым болгондой, билим берүү уясынун курулушу республикалык бюджеттин эсебинен каржыланып, курулуш иштери 2015-жылы башталган.
Мектептин эски имараты 1958-жылы ашар жолу менен салынып, ал эми 1982-жылы экинчи корпусу салынган. Бул жылдар аралыгында имарат капиталдык оңдоп-түзөөдөн өтпөгөндүктөн, авариялык абалга келип калган.
Бүгүнкү күндө жаңы курулуп жаткан корпустун экинчи кабатынын дубалы тургузулуп, чатырын жабуу иштери жүргүзүлүүдө.
