Вашингтондо Касымалиев Дүйнөлүк банктын аткаруучу директору менен негизги долбоорлорду талкуулады
Дүйнөлүк банк тобунун жана Эл аралык валюта фондунун башкаруучуларынын жылдык жолугушуусунун алкагында Вашингтонго болгон жумушчу сапарынын алкагында Кыргызстандын министрлер кабинетинин төрагасынын биринчи орун басары Адылбек Касымалиев менен Швейцария өлкөлөрүнүн тобунан Дүйнөлүк банктын аткаруучу директору Беатрис Мазердин жолугушуусу болду.
Жолугушууда тараптар Камбар-Ата ГЭС-1 курулушун каржылоо жана бюджеттик пландоо маселелерине басым жасоо менен Кыргызстандын экономикасын өнүктүрүүгө багытталган негизги долбоорлорду талкуулашты.
Адылбек Касымалиев Камбар-Ата ГЭС-1 долбоорунун Борбор Азиядагы энергетикалык коопсуздукту жана аймактык кызматташтыкты өнүктүрүүнүн кыймылдаткычы катары маанилүүлүгүн белгиледи.
“Бул долбоорду ишке ашыруу Кыргызстанды таза жана арзан энергия менен гана камсыз кылбастан, жаңы жумуш орундарын түзүүгө, экономикалык өсүштү стимулдаштырууга жана өлкөнүн инвестициялык жагымдуулугун жогорулатууга мүмкүндүк берет”, – деди ал.
Өз кезегинде Беатрис Мазер Дүйнөлүк банк Кыргызстандын экономикасын өнүктүрүүгө багытталган долбоорлорго, анын ичинде Камбар-Ата ГЭС-1ди курууга ар тараптуу колдоо көрсөтүүгө даяр экенин ырастады. Ал бул долбоордун Кыргызстан үчүн да, бүтүндөй Борбор Азия чөлкөмү үчүн да маанисин белгилеп, анын аймактык энергетикалык коопсуздукту жана туруктуу өнүгүүнү чыңдоо потенциалын белгиледи.
Тараптар ошондой эле Кыргызстандагы учурдагы экономикалык абалды, мамлекеттик башкарууда реформаларды ишке ашырууну, ошондой эле жашыл жана инклюзивдик өсүштү колдоо стратегияларын талкуулашты.
Жолугушуунун соңунда Адылбек Касымалиев Беатрис Мазерди Кыргызстанга келип кетүүгө чакырды, анын айтымында, бул “Дүйнөлүк банк менен эки тараптуу кызматташууну мындан ары чыңдоо үчүн маанилүү кадам болот”.
Маалымат үчүн: Беатрис Мазер – Дүйнөлүк банк тобунун Директорлор кеңешиндеги Швейцариялык топтун аткаруучу директору болуп иштейт, анын курамына Кыргызстан, Азербайжан, Казакстан, Польша, Сербия, Тажикстан, Түркмөнстан, Өзбекстан, Швейцария кирет.
