Жогорку Кеңештин төрагасы Өзбекстандын элчисин кабыл алды

Бүгүн Жогорку Кеңештин төрагасы Нурланбек Тургунбек уулу Өзбекстандын Кыргызстандагы элчиси Саидикрам Ниязходжаевди кабыл алды.

Жолугушууда кыргыз-өзбек алакаларынын учурдагы абалы, эки өлкө ортосундагы саясий-экономикалык, маданий-гуманитардык байланыштарды өнүктүрүү маселелери талкууланып, парламенттер аралык кызматташтыкты кеңейтүү тууралуу да сөз болду.

Алгач Нурланбек Тургунбек уулу Саидикрам Ниязходжаевди Кыргызстандагы дипломатиялык ишмердүүлүгүнүн башталышы менен куттуктап, дасыккан, тажрыйбалуу элчи катары боордош эки элдин байланышын жаңы деңгээлге көтөрөрүнө ишенерин билдирди.

“Бизди бир туугандык, коңшулук жана стратегиялык өнөктөштүк мамилелер жакындатып турат. Айрыкча акыркы жылдары алакаларыбыз жигердүү өнүгүп, ишенимдүү саясий диалог үзгүлтүксүз уланууда. Бизде мүмкүнчүлүктөр өтө чоң. Алардын бардыгын пайдаланып, соода-экономикалык, маданий-гуманитардык байланыштарыбызды жаңы деңгээлге чыгарышыбыз кажет”, – деди төрага.

Муну менен катар алакаларды арттырууда парламенттик дипломатиянын ролу чоң экенин белгилеген Нурланбек Тургунбек уулу аталган багытта да алгылыктуу иштер жүргүзүлүп жатканына токтолду.

“Жогорку Кеңеш Өзбекстандын парламентинин эки палатасы менен тең эриш-аркак иш алып барып, жетишилген келишимдердин ийгиликтүү ишке ашуусуна өзгөчө көңүл буруп келебиз. Анын ичинен парламенттер аралык комиссиянын алкагындагы алакаларыбыз жигердүү уланып, байма-бай жолугушуулар өткөрүлүүдө”, – деди Нурланбек Тургунбек уулу.

Мындан тышкары, Кыргызстан менен Өзбекстан эл аралык аянтчаларда да бири-бирин колдоп келе жатканын эске салган төрага быйылкы жылга мерчемделген эки тараптуу иш-чаралар тууралуу да сөз кылды.

Өз кезегинде жаңы элчи Саидикрам Ниязходжаев Кыргызстандагы дипломатиялык ишмердүүлүгүнүн алкагында жасай турган иштери тууралуу учкай маалымат берип: “Өзбекстан Кыргызстан менен кызматташыкка өзгөчө маани берет. Элчилик ишмердүүлүгүмдүн алкагында калыптанган достук алакаларды өнүктүрүп, жакын коңшулук жана бир туугандык мамилелерди күчөтүү боюнча иш алып барам. Мамлекеттерибиз ортосунда көптөгөн макулдашуулар жана келишимдер бар. Алардын бардыгын ийгиликтүү ишке ашыруубуз кажет”, – деди.

Мындан сырткары, элчи парламенттер аралык кызматташтыкты кеңейтүүгө багытталган сунуштары менен да бөлүштү.