Жогорку Кеңеш Азамат Жамангуловду Санариптик өнүктүрүү жана инновациялык технологиялар министри кызматына дайындоого макулдук берди

Жогорку Кеңештин жыйынында Азамат Жамангуловду Санариптик өнүктүрүү жана инновациялык технологиялар министри кызматына дайындоого макулдук берүү маселеси каралып, жактырылды.

Азамат Жамангуловду Санариптик өнүктүрүү жана инновациялык технологиялар министри кызматына дайындоо жөнүндө Кыргыз Республикасынын Президентинин сунушун Президенттин жана Министрлер кабинетинин Жогорку Кеңештеги туруктуу өкүлү Алмасбек Абытов тааныштырды.

Анда айтылгандай, Санариптик өнүктүрүү министрлиги Санариптик өнүктүрүү жана инновациялык технологиялар министрлиги болуп өзгөртүлгөндүгүнө байланыштуу министрлик кызматка Азамат Жамангуловдун талапкерлиги кайрадан сунушталды.

Талкуу маалында депутаттар мамлекеттик кызматтарды жакшыртуу, бюрократиялык жол-жоболорду азайтуу керектигин белгилешти. Алсак, депутаттар Бактыбек Чойбеков, Илимбек Кубанычбеков «Түндүк» электрондук кызмат кѳрсѳтүлѳр мамлекеттик парталы аркылуу алына турган кызматтардын санын көбөйтүү зарылдыгын айтышса, эл өкүлү Алишер Козуев тармактык министрликти мектептерге жана бала бакчаларга электрондук кезек системасын жакшыртууга, бул жаатта ички мигранттардын укуктарын эске алууга чакырды.