ЖК төрагасы: Чек арада талаш жерлер 50/50 чечилди

Бүгүн Жогорку Кеңештин жыйынында кыргыз-тажик чек арасы боюнча келишимдин долбоору тууралуу депутат Султанбай Айжигитов билдирүү жасап, Баткен районундагы Достук айылын Тажикстанга бербеш керектигин билдирген. Мындан улам, “Кабар” агенттиги Жогорку Кеңештин төрагасы Нурланбек Тургунбек уулуна кайрылып, бул туурасында маек курду.

– Нурлан мырза саламатсызбы. Өткөндө парламенттин комитеттеринин биргелешкен жыйынында кыргыз-тажик чек арасы жөнүндө келишим каралып, аны эл өкүлдөрү бир добуштан колдоп беришти эле. Бүгүн болсо Жогорку Кеңештин жалпы жыйынында депутат Султанбай Айжигитов чек ара келишиминде кыргыз тарап уттуруп койду деген мааниде сөз сүйлөдү. Ушул боюнча кандай комментарий бере аласыз?

– Эки тарап тең уттурган жок. Бардык талаш жерлер 50/50 чечилди. Айылдар алмашты. Жерлеринин көлөмү канча болсо ошончо жерлери менен алмашылды. Мисалы, Достук айылыбыз тажик тарапка өтсө бизге Самонион айылы өтүп атат. Алар деле “Айылыбызды бергибиз келбей жатат, ата бабаларыбыздын сөөгү жатат” деп атышат. Бул жерде бир айылдын маселеси чечилип жаткан жок. Эки мамлекеттин маселеси чечилип жатат. Айылдар алмашылып атканы эң туура болду. Себеби, Достук айылыбыз Тажикстанга чапташып турган жалгыз айыл. Самонион айылы Кыргызстанга чапташып турат. Шахматтык түрдө жайгашып калган. Ошол үчүн алмашуулар туура эле болду. Эми мындан ары чыр чатак чыкпайт. Түбөлүк тынчтык, ынтымак орнойт.

– Кесиптешиңиз Достук айылы биз үчүн стратегиялык мааниге ээ, аны бербеш керек эле деди. Чын эле бул айыл стратегиялык мааниге ээби?

– Эч кандай стратегиялык мааниге ээ эмес. Тескерисинче Баткенден алыс жайгашкан, Тажикстандын чек арасына чапташып турган айыл. Алар деле Самонион же Ходжайлоо айылдарыбыз стратегиялык мааниге ээ айылдар дей беришсе жарашат да. Ошондуктан эки тарап тең уттурган жок. Теңме тең чечилип келгенин Камчыбек Кыдыршаевич комитеттин жыйынында түшүнүктүү кылып айтып берди. Түшүнүп туруп эле түшүнгүсү келбегендер сүйлөй берет экен да.

Стратегиялык деп Төрт көчөнү айтсак болот. Азыр Төрт көчөгө статус КВО берилип, нейтралдуу болду. Мына ушуну чоң утуш десек болот.

Ал эми Ворухка 3,5 км жол берилсе биз Самаркандектен Миң-Өрүккө чейин 3,5 км жол алып атпайбызбы. Бул жерде да теңме-тең болуп жатат. Кай жеринен уттурдук?!

– Жогорку Кеңештин депутаттары кыргыз-тажик чек арасы жөнүндө келишимди колдобой коюшу мүмкүнбү? Сиз төрага катары көпчүлүк депутаттардын бул маселеге карата позициясын билсеңиз керек?

– Колдойт. Кечээ жакында биргелешкен комитеттин жыйынында депутаттардын дээрлик баары эле колдогон. Сессияда деле колдошот.

Маектешкен Кыргыз улуттук “Кабар” маалымат агенттигинин директору Медербек Шерметалиев