Жээнбек Кулубаев Нью-Йоркто БУУӨПтүн администратору менен жолукту
Бүгүн тышкы иштер министри Жээнбек Кулубаев БУУнун Өнүктүрүү программасынын администратору Аким Штайнер менен жолугушту.
Ведомстводон маалымдашкандай, тараптардын жолугушуусу Нью-Йорк шаарында өтүп жаткан БУУнун Башкы ассамблеясынын 79-сессиясынын Жогорку деңгээлдеги жумалыгынын иш-чараларына катышуусунун алкагында өттү.
Жолугушуунун жүрүшүндө тараптар Кыргызстан менен БУУнун Өнүктүрүү программасынын ортосундагы эки тараптуу кызматташуу маселелерин, анын ичинде өлкөдөгү реформаларды колдоого жана эл аралык демилгелерди практикалык ишке ашырууга байланышкан маселелерди талкуулашты.
Министр Кулубаев БУУнун Өнүктүрүү программасынын социалдык-экономикалык чөйрөдөгү долбоордук ишмердүүлүгүн жогорулатуу зарылдыгын белгиледи. БУУӨПтү өлкөдө жакырчылык менен күрөшүү, аялдардын жана балдардын ден соолугун чыңдоо, мигранттар менен иштөө, айылдарда билим берүү, алыскы тоолуу райондордо инфраструктураны өнүктүрүү, калктын сууга жана энергияга жетүүсүн камсыз кылуу жана Баткен облусун өнүктүрүүнүн алкагында жаңы долбоорлорду ишке ашырууга чакырды.
Өз кезегинде Штайнер БУУӨПтүн Туруктуу өнүктүрүү максаттарына жетүү үчүн Кыргызстанда ишке ашырылып жаткан учурдагы долбоорлор боюнча ишти улантууга, ошондой эле кызматташуунун белгиленген артыкчылыктуу багыттары боюнча ишти баштоого даяр экендигин билдирди.
Айлана-чөйрөнү коргоо жана тоолуу аймактарды өнүктүрүү жаатындагы кызматташуу боюнча пикир алмашуу болду. Жээнбек Кулубаев А.Штайнердин көңүлүн тоолуу мөңгүлөрдүн интенсивдүү эришине алып келген глобалдык климаттын өзгөрүшүнө байланыштуу кырдаалга көңүл бурду. Тоолуу өлкөлөрдүн көйгөйлөрү жана кыйынчылыктары бир гана тоолуу өлкөлөрдүн маселеси болбошу керек. Тоо проблемаларын чечүү боюнча жалпы күч-аракеттер дүйнөлүк коомчулукка багытталышы керек.
Ошондой эле Кулубаев кыргыз тарап экологиялык жана «жашыл» долбоорлорду ишке ашырууда БУУнун Өнүктүрүү программасынын колдоосуна, ошондой эле парник газдарынын эмиссиясын азайтуу боюнча максаттарга жетүү үчүн колдоого таянат.
Бул контекстте тараптар БУУнун Климат боюнча трасттык фондун Кыргызстанда эртерээк ишке киргизүү боюнча макулдашышты. БУУӨПтүн администратору Кыргызстандагы чокулардын бирине БУУнун атын берүү уюм үчүн сыймык экендигин белгиледи.
Жолугушуунун соңунда министр Ж.Кулубаев кыргыз тараптын кызматташууну мындан ары өнүктүрүүгө кызыкдар экенин ырастап, ошондой эле БУУнун Өнүктүрүү программасынын Кыргызстандагы өкүлчүлүгүнүн ишмердүүлүгүнө колдоо көрсөтүүгө ишендирди.
