Жалал-Абадда жер көчкү активдешип, 10 үй-бүлө коопсуз жайга көчүрүлүүдө
Аксы районуна караштуу Жүзүмжан айылында эски жер көчкү активдешкени байкалууда. Бул тууралуу Өзгөчө кырдаалдар министрлигинен билдиришти.
Буга байланыштуу учурда кооптуу аймакта жашаган 10 үй-бүлө убактылуу коопсуз жайга көчүрүлүүдө.
Учурда жеринде ӨКМдин жана райондук Жарандык коргоо кызматынын кызматкерлери иш алып барууда.
Ал эми үй-бүлөлөрдү коопсуз жайга көчүрүү үчүн райондук өзгөчө кырдаалдар бөлүмүнүн өздүк курамы тартылып, көчүрүү комиссиясы тарабынан автоунаалар бөлүнүп, коопсуз аймакка чыгарылууда.
Жалал-Абад облусунун аймагындагы жер көчүү мүмкүн болгон кооптуу аймактарда 1 миңден ашуун үй-бүлө жашайт.
ӨКМ тарабынан жыл сайын жаз-жай мезгилдеринде жергиликтүү бийлик өкүлдөрүнө жана тургундарга эскертүү баракчалары таратылат.
