Тармактык комитет “Ыш менен байланышкан экологиялык абал жөнүндө” Жогорку Кеӊештин токтомунун аткарылышы тууралуу маалымат укту

Бүгүн, 20-январда Кыргыз Республикасынын Жогорку Кеңешинин Агрардык саясат, суу ресурстары, экология жана регионалдык өнүктүрүү боюнча комитети “Ыш менен байланышкан экологиялык абал жөнүндө” Кыргыз Республикасынын Жогорку Кеӊешинин 2023-жылдын 3-майындагы №1147-VII токтомунун аткарылышы тууралуу маалымат укту.

Бул багытта Кыргыз Республикасынын Жаратылыш ресурстары, экология жана техникалык көзөмөл министри Медер Машиев жана Бишкек шаарынын мэри Айбек Джунушалиев маалымат берди.

Медер Машиев мамлекеттик органдардын ишинин натыйжасында Бишкек менен Чүй облусунда акыркы жылдары ыш азайганын билдирди. Анын айтымында, эң күчтүү ыш 2021-2022-жылдары катталган. 2023-жылы Ведомстволор аралык комиссия түзүлүп, ага 11 министрлик жана ведомство башчыларынын орун басарлары кирген. Анын айтымында, эл аралык уюмдардын изилдөөсүнө ылайык, абанын булганышынын негизги себептери турак — жай конуштарында көмүрдүн күйүшү — 40%, эски машиналардын чыккан газы — 30%, ЖЭБ — 15%, чаң — 13,5%, өндүрүш ишканалары-1,5%.

Талкуу учурунда депутат Дастан Бекешев Бишкек шаарында жана анын тегерегинде жайгашкан турак жайлардын газдаштырылганын тактады. Муну менен катар депутат борбор калаада жашылдандыруу иштеринин жүрүшү боюнча маалыматты сурады. “Газпром Кыргызстан” ишканасынын директорунун орун басары Арзымат Алдаяров билдиргендей, Бишкекте 135 миң кожолук көгүлтүр от колдонсо, административдик аймактык реформанын негизинде 83 миң үйдү газдаштыруу пландаштырылып жатат.

Депутат Аманкан Кенжебаев Бишкек шаарында газга кошулгандар аз экенин белгиледи. Анын айтымында, газдаштыруу программасы боюнча пайыздык чен өтө жогору. “Банк мындай насыяны 8% менен берет, бул жогорку чен”, – деп кошумчалады ал. Депутат Султанбай Айжигитов бул көйгөй Бишкек шаарында гана эмес, башка аймактарда да орун алып жатканыy айтып, пландуу иш аракеттерге өтүү зарылдыгын баса белгиледи.

Ал эми депутат Балбак Түлөбаев Кара-Кеченин көмүрүн колдонуудан баш тартуу, унааларда катализаторлордун болуусун көзөмөлгө алуу, шаарды газдаштыруу маселесин толук  чечүү аркылуу абанын сапатын жакшыртууга болорун билдирди.  Балбак Түлөбаев бул багытта Бишкек шаарынын мэриясына республикалык бюджеттен кошумча каражат бөлүп берүү сунушун айтты. Депутат Жалолидин Нурбаев абанын булганышы жарандардын ден соолугуна олуттуу таасирин берип жатканын айтып, бул багытта Саламаттык сактоо министрлигинен маалымат сурады.  Муну менен катар эл өкүлү өлкөнүн ири шаарларында жашылдандыруунун алкагында тигилген дарактардын абалын текшерүү боюнча сунушун айтты. Депутат Нурбек Алимбеков катализатор маселесинде элге оорчулук жаратпай, унааларга акысыз орнотуу жагынан мамлекеттик деңгээлде көмөк көрсөтүү маселесин белгиледи.  Эл өкүлү Жылдыз Таалайбек кызы атмосферанын булганышы түрдүү ооруларга себеп болуп жатканына кайрылып, билим берүү мекемелерине абаны тазалоочу жабдыктарды орнотуу маанилүүлүгүнө көңүл бурду.  Ушул эле маселеге көңүл бурган депутат Нилуфар Алимжанова ыш көйгөй жараткан аймактардагы мекеме-ишканаларга, билим берүү мекемелерине абаны тазалоочу техникалык жабдыктарды орнотуу сунушун көтөрдү.