Таласта жер титирөөдө жабыркаган 48 үй аныкталды

Талас районунда 28-мартта болгон жер титирөөлөрдө жабыркаган 48 үй аныкталып, акт түзүлдү.

Райондук Жарандык коргонуу комиссиясы жер силкинүү болгон күндөн тартып айыл аймактарда иликтөө иштерин жүргүзүшүп, жарака кеткен үйлөрдү аныкташты. Алардын берген маалыматы боюнча бүгүнкү күндө жабыркаган 48 турак үйдүн 31и камсыздандырылган. Калган 17 үй камсыздандыруудан өткөн эмес.

Жарака кеткен үйлөр:

* Каракол айыл аймагынын Көпүрө-Базар айылында – 26;

* Арал айылында – 12;

* Үч-Эмчек айылында – 2;

* Шумкар-Уя айыл аймагынын Талды-Булак айылында – 6;

* Чоң-Алыш айыл аймагынын Манас айылында – 1;

* Кең-Кол айыл аймагынын Көк-Ой айылында – 1.

Белгилей кетсек, кырсык катталган сааттан тартып Өзгөчө кырдаалдар министрлигинин жана облустук, түзүмдүк бөлүмдөрүнүн өздүк курамы ыкчам жыйынга чогулуп, абалды көзөмөлдөө, зарыл болгон чараларды көрүү, өзгөчө даярдыкта турууну камсыз кылуу тапшырмасы коюлган.