Төрт айда өлкөдөн 13 миң тонна сүт азыктары экспорттолду
2025-жылдын январь-апрель айларынын аралыгында Кыргызстандан 13 миң тонна сүт азыктары экспорттолду. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Маалыматка караганда, бул өткөн жылдын ушул мезгилине салыштырмалуу 4 миң тоннага көп, же болбосо 44,5% өсүштү түздү.
Экспорттолгон негизги сүт азыктары:
- каймак май – 863,4 тонна;
- балмуздак – 999,4 тонна;
- сыр – 662,3 тонна;
- кургак сүт – 363,0 тонна;
- шоро – 3,1 тонна;
- курут – 0,5 тонна.
Негизинен каймак май, балмуздак жана сыр эң көп көлөмдө сыртка чыгарылган. Бул товарларга сырткы рынокто суроо-талап жогору экенин билдирет.
Ички өндүрүштүн потенциалы – аталган өсүш ата мекендик сүт өнөр жайынын техника, сапат жана көлөм жагынан өнүккөнүн көрсөтөт.
Белгилесек, Кыргызстандын сүт өнөр жайы 2025-жылдын башынан тартып чет элдик рынокто өз ордун бекемдөөгө карай олуттуу кадам таштады. Экспорт көлөмүнүн өсүшү – бул айыл чарбасын өнүктүрүүгө, фермерлердин кирешесин арттырууга жана экономиканын туруктуулукка оң таасир берет.
