Төрага Нурланбек Тургунбек уулу: Саламаттыкты сактоо тармагын өнүктүрмөйүн калктын ден соолугуна кам көрө албайбыз

Жогорку Кеңештин Төрагасы Нурланбек Тургунбек уулу Аксы районундагы иш сапарын Ак-Жол айыл аймагында улантып, Тегене айылында курулган фельдшердик-акушердик пункттун (ФАП) ачылышына катышты.

Алсак, 1500гө жакын калкты тейлеген заманбап медициналык жайдын курулушуна Коомчулукту өнүктүрүү жана инвестициялоо агенттиги (АРИС) тарабынан 9 млн сомдон ашуун каражат жумшалган.

Төрага Нурланбек Тургунбек уулу акыркы жылдары мамлекет тарабынан саламаттыкты сактоо тармагына өзгөчө көңүл бурулуп жатканын белгилеп: “Айрыкча ак халатчан адистерди татыктуу айлык акы менен камсыздоо ишине басым жасалууда. Себеби биз дарыгерлердин маянасын көтөрүп, медициналык жайлардагы шартты жакшыртпасак, калкыбыздын саламаттыгына кам көрө албайбыз”,- деди.

Ошону менен бирге дарыгерлерди оорулууларга аяр мамиле кылып, кесиптик милдеттерди бекем сактоого чакырган Төрага: “Илдетке дарыдан мурун жакшы мамиле даба болот. Андыктан, медициналык жайда эмгектенген бардык адистер оорулууларга жакшы мамиле жасап, жоопкерчилигин унутпашы керек”,- деп кошумчалады.

Мындан тышкары, мамлекеттин башкы байлыгы эли экенин белгилеп: “Кудайга шүгүр, калкыбызды саны өсүп барат. Бирок ошол эле учурда ар кандай илдетке чалдыккан жарандарыбыздын да катары арбын. Ага ылайык, калк арасындагы өнөкөт оорулардын алдын алып, медицина тармагында илим менен тажрыйбаны айкалыштырган реформалар жүргүзүлүшү керек”, – деди.

Муну менен катар Аксы районунда ишке ашырылып жаткан долбоорлор тууралуу кеп кылган Төрага буга Кербен шаарындагы жаңыланып жаткан стадиондун жанында заманбап ден соолукту чыңдоо борбору да курулуп жатканын мисал кылды.

“Элет жеринде сергек жашоо образын жайылтып, калктын саламаттыгына кам көрүүдө спорттук жана ден соолукту чыңдоо мекемелердин мааниси чоң. Ага ылайык, былтыр мамлекет тарабынан Кербен шаарындагы социалдык-инфраструктуралык курулуштарга 200 млн сом бөлүнсө, быйыл 300 млн сом каралды. Мерчемделген долбоорлор толук ишке ашырылса, Аксы району, айрыкча Кербен шаары өнүккөн калаага айланат деген ишеничтемин”, – деди Нурланбек Тургунбек уулу.