Төрага Нурланбек Тургунбек уулу Аксы жергесинде жаңы мектептин пайдубалына капсула салды

Жогорку Кеңештин Төрагасы Нурланбек Тургунбек уулу Аксыдагы иш сапарынын алкагында Жылгын айылында курула турган М.Барпиев атындагы №19 орто мектептин жаңы имаратынын пайдубалына капсула салды.

Эске салсак, 3 кабаттан турган билим берүү жайы 225 орунга ылайыкташтырылып долбоорлонгон. Ал эми анын курулушуна жалпы 80 млн сомго жакын каражат жумшалары мерчемделүүдө.

Ошондой эле Нурланбек Тургунбек уулу аталган мектептин жанында курулган күрөш залынын ачылышына да катышты. Алсак, 2022-жылы ашар жолу аркылуу башталган машыгуу жайынын курулушуна жана башка керектүү спорттук шаймандарды алууга жардам катары Төрага резервдик фондунан каражат бөлгөн.

Жаңы мектептин пайдубалына мезгил кутусун салып, ошону менен бирге жаңы күрөш залынын кызыл тасмасын да кескен Төрага ушул куттуу жайлардан Кыргызстанды дүйнөгө тааныткан уул-кыздар өсүп чыксын деген тилегин билдирди.

“Касиеттүү Аксы жергеси таанымал инсандары менен тарыхта калган. “Аккан арыктан суу агат” – дегендей, Жылгын айылынан да кызыл байрагыбызды бийиктерде желбиреткен таланттуу балдар чыгарына терең ишенем”, – деди Нурланбек Тургунбек уулу.

Андан тышкары, салтанаттын алкагында айыл эли менен да баарлашып, өлкөдө жүргүзүлүп жаткан реформалар, анын ичинен Аксы районунда ишке ашырылып жаткан долбоорлор тууралуу кеңири кеп кылды.

Тагыраагы, 2021-2026-жылдар аралыгында Аксыдагы 14 мектепти жана башка дагы көптөгөн социалдык мекемелерди жаңылап куруу пландалганын айткан Төрага: “Булардын көпчүлүгү ишке ашырылды. Бирок аймактарды өнүктүрүүгө багытталган жумуштар дагы улантылып, бир катар социалдык-инфраструктуралык долбоорлор жасалат. Биз элетти өнүктүрмөйүн мамлекетти алдыга жылдыра албайбыз. Андыктан, айыл жериндеги калк турмушун жакшыртуу маселеси мамлекеттик саясатыбыздын артыкчылыктуу багыты бойдон кала берет”, – деди.