Төрага Нурланбек Шакиев Өзгөн районундагы социалдык мекемелердин абалынан кабар алууда

Бүгүн, 30-августта Кыргыз Республикасынын Жогорку Кеңешинин Төрагасы Нурланбек Шакиев Ош облусунун Өзгөн районундагы иш сапарынын алкагында Алга айылында жайгашкан “Азада Апа” балдар бакчасынын абалы менен таанышты.

Алсак, аталган бала бакча 1981-жылы чабандар үчүн курулган жатаканага жайгаштырылган. Азыркы тапта авариялык абалдагы бала бакчада 60тан ашуун бала тарбияланып, 180дей наристе кезекте турат. Андыктан, жаңы бала бакча салуу максатталып, долбоору иштелип чыкканы менен курулушу баштала элек.

Жергиликтүү тургундар менен өткөрүлгөн жолугушууда бала бакчанын курулушу тездетилерин айткан Нурланбек Шакиев өзү да жардам катары Төраганын резервдик фондунан 100 миң сом которорун билдирди.

Ошондой эле Төрага 90 орунга ылайыкталган бала бакчанын долбоорун кайра өзгөртүү талабын коюп: “Жылдан-жылга калктын саны өсүүдө. Андыктан, дароо эле 150 орунга ылайыкталган заманбап бала бакча куруу зарыл”, – деди.

Андан соң Төрага Нурланбек Шакиев К.Ботобеков атындагы орто мектептин курулуш иштеринен кабар алды. Ушул жылдын октябрь айында ишке берилери күтүлүп жаткан имаратка мамлекет тарабынан 115 млн сом каралып, өткөрүлгөн тендерден кийин 87 млн сом сарпталары такталган.

Төрага Нурланбек Шакиев жаңы мектеп балдардын жаркын келечеги үчүн кызмат кылсын деген тилегин билдирип, тиешелүү жетекчилерди курулуштун сапатына өзгөчө көңүл бурууга чакырды.

Эскерте кетсек, Төрага Нурланбек Шакиевди депутаттар Эльмурза Сатыбалдиев, Улугбек Ормонов, Данияр Төлөнов, билим берүү жана илим министринин орун басары Уланбек Усеков, Архитектура, курулуш жана турак жай-коммуналдык чарба мамлекеттик агенттигинин директору Мырзабек Жыпаркулов баштаган жергиликтүү жетекчилер коштоп жүрөт.