Салык кызматы: Эми отчет берүү мөөнөтүн онлайн түрдө узартууга болот

Эми Салык төлөөчүнүн кабинетинде отчет берүү мөөнөтүн узартууга арыз берүү функциясы жеткиликтүү. Бул тууралуу Мамлекеттик салык кызматы билдирет.

Маалыматка ылайык, Аарыз отчеттуулук мөөнөтү аяктаганга чейин берилиши керек. Салык органы карап чыккандан кийин 30 күнгө узартуу боюнча чечимди кабыл алат.

Маанилүү! Отчеттуулуктун мөөнөтүн узартуу салык төлөөнүн мөөнөтүн өзгөртпөйт.

Бул узартуу ЕАЭБ өлкөлөрүнөн импорттоодогу кыйыр салыктар боюнча отчетторго жайылтылбайт.

Ошону менен бирге, Салык кызматы Кыргыз Республикасынын 2025-жылдын 12-февралындагы №37 Мыйзамына ылайык Салык кодексине салык төлөөчүлөрдү мурдагы мезгилдер менен бирге “нөлдүк” көрсөткүчтөр менен отчетторду берүүдөн бошотуучу өзгөртүүлөр киргизилгенин эскертет.

Бул өзгөртүүлөр отчетту өз убагында бербегендиги үчүн салык санкцияларын колдонууга дагы тиешелүү.

Салык санкцияларынын өлчөмү:

1) жеке жактарга – 10 эсептик көрсөткүч;

2) жеке ишкерлерге – 30 эсептик көрсөткүч;

3) уюмдарга – 70 эсептик көрсөткүч.

Бирдиктүү салык декларациясын (мамлекеттик жана муниципалдык кызмат орундарын ээлеген жеке жактар берген декларациядан тышкары) мөөнөтүндө тапшырбагандыгы үчүн 70 эсептик көрсөткүч өлчөмүндөгү салык санкциясы каралган.

Санкция өз убагында тапшырылбаган отчеттун ар бир фактысы үчүн колдонулат.

Санкция колдонула турган мезгилдер:

• Салык отчеттуулугу – 2025-жылдын 1-январынан баштап (нөлдүк көрсөткүчтөр менен отчет берүүдөн тышкары).
• Бирдиктүү салык декларациясы – 2024-жылдын салык мезгилинен баштап (себеби тапшыруу мөөнөтү 2025-жылдын 1-апрелине жана 1-майына чейин болот).

Отчетту өз убагында тапшырбагандыгы үчүн санкция Салык кодексине ылайык автоматташтырылган режимде салык төлөөчүлөрдүн өздүк эсептеринде эсептелет.

Салык санкциялары төмөнкү учурларда колдонулбайт:

1) Салыктык эмес төлөмдөр жана камсыздандыруу төгүмдөрү боюнча – анткени алар салыктык эмес кирешелер жөнүндө кодекс жана “Мамлекеттик социалдык камсыздандыруу жөнүндө” Мыйзамы менен жөнгө салынат;

2) Ал жеткис күчтүн жагдайларында – санкциялар Министрлер Кабинетинин чечими боюнча жокко чыгарылат;

3) Отчет берүү мөөнөтүн узартууда – эгерде салык органы мөөнөттү расмий узарткан болсо.