Садыр Жапаровдун Бакуда өткөн COP29 климаттык иш-аракеттер боюнча дүйнөлүк лидерлердин Саммитине катышуусу аяктады

Кыргыз Республикасынын Президенти Садыр Жапаровдун Баку шаарында (Азербайжан Республикасы) Бириккен Улуттар Уюмунун Климаттын өзгөрүүсү боюнча Алкактык Конвенциясынын тараптарынын 29-конференциясына (COP29) катышуусу аяктады.

Иш-чарага дүйнө жүзүнөн 50 миңге жакын адам, анын ичинде 100дөн ашык өлкөнүн лидерлери катышты. 22-ноябрга чейин созула турган COP29дун негизги темалары – парник газдарынын эмиссиясын азайтуу чаралары, климатты каржылоо маселелери, энергетикадагы технологиялык инновациялар, жаш муундарга билим берүү жана жаштардын климаттын өзгөрүшүнө каршы демилгелерин колдоо.

Мамлекет башчысы 12-ноябрда, Бириккен Улуттар Уюмунун Климаттын өзгөрүүсү боюнча Алкактык Конвенциясынын тараптарынын 29-конференциясында улуттук билдирүү жасады, анда Париж келишиминин максаттарына жетүү үчүн координацияланган жана каржылык жактан колдоого алынган чараларды көрүүгө чакырды.

Ал тышкы карызды туруктуу өнүгүү долбоорлоруна алмашуу механизмин сунуштап, Климаттык трасттык фондду түзүүнү сунуштады.

Президент кайра жаралуучу энергия булактарынын маанилүүлүгүн белгилеп, ГЭСтердин жана күн электр станцияларынын долбоорлорун белгилеп, мөңгүлөрдүн эришине жана суу ресурстарына болгон коркунучтарды санап өттү. Ал эл аралык өнөктөштөрдү тоолуу аймактарды туруктуу өнүктүрүү боюнча демилгелерди колдоого чакырды.

Садыр Жапаров климаттык иш-аракеттер боюнча дүйнөлүк лидерлердин Саммитинин алкагында Пакистан Ислам Республикасы тарабынан уюштурулган климаттык каржылоого арналган жогорку деңгээлдеги тегерек столдо сөз сүйлөдү.

Президент өз сөзүндө климаттын өзгөрүшүнүн кесепеттери бардык өлкөлөрдүн туруктуу өнүгүүсүнө олуттуу коркунуч туудуруп жатканын, ошондуктан климаттык каржылоо темасы өзгөчө мааниге ээ экенин баса белгилеп өттү.

Ошону менен бирге Мамлекет башчысы 13-ноябрда Кыргызстан тарабынан Азербайжан жана Монголия менен биргеликте уюштурулган тоолор жана климаттын өзгөрүшү боюнча Жогорку деңгээлдеги диалогго катышып, сөз сүйлөдү.

Садыр Жапаров өз сөзүндө эл аралык коомчулукту климаттын өзгөрүшүнө эң аз таасир эткен тоолуу өлкөлөргө, бирок климаттык өзгөрүүлөргө эң аялуу болгон мамлекеттерге колдоо көрсөтүүнү күчөтүүгө чакырды.

Президент Непал тарабынан уюштурулган “Тоолор коркунучта: Гималайдагы жоготуулар жана зыяндарды чечүү” аттуу тегерек столдо Борбор Азиядагы миллиондогон адамдарды суу менен камсыз кылган мөңгүлөр тездик менен жок болуп жатканын баса белгиледи. Бул бир гана Кыргызстандын көйгөйү эмес – бул регионалдык жана глобалдык көйгөй.

Дал ушундан улам Кыргызстан БУУда Тоо күн тартибин алдыга жылдыруу жоопкерчилигин өз мойнуна алып, дүйнөдөгү тоолуу аймактардын өзгөчө көйгөйлөрүн таанууну колдоп жатат.

Мамлекет башчысы БУУнун Климаттын өзгөрүүсү боюнча Алкактык Конвенциясынын тараптарынын 29-конференциясына катышуунун алкагында “Кыргызстан: тоолорду туруктуу өнүктүрүү” аттуу улуттук павильонго барды.

21-ноябрга чейин ачык болгон павильондо күн сайын өлкөнүн министрликтеринин жана ведомстволорунун катышуусу менен климаттык күн тартибинин, Кыргызстандын энергетикалык, соода-экономикалык, туристтик жана инвестициялык потенциалынын актуалдуу маселелери боюнча презентациялар, ошондой эле маданий иш-чаралар, улуттук тоо продукцияларынын көргөзмөлөрү (бал, кургатылган жемиштер, улуттук суусундуктар ж.б.) жана алардын даамын таттыруулары өткөрүлөт.

Баку шаарында өткөн БУУнун Климаттын өзгөрүүсү боюнча Алкактык Конвенциясынын тараптарынын 29-конференциясына катышуусун аяктап, Президент Садыр Жапаров 13-ноябрда Бишкек шаарына кайтып келди.