Россиядагы кыргызстандык мигранттардын 85 млн рубль төлөнбөгөн эмгек акысын алууга жардам берилди
Эмгек, социалдык камсыздоо жана миграция министрлигинин Россиядагы өкүлчүлүгү эмгек мигранттарына үч жылдын ичинде 85 миллион рублдан ашык төлөнбөгөн эмгек акы алууга жардам берди. Бул тууралуу ведомствонун басма сөз кызматы билдирет.
Өкүлчүлүктөн кабарлашкандай, бул аралыкта 3 258 кыргызстандык кайрылган. 2022 – жылы төлөмдөрдүн жалпы суммасы 2,1 млн рублди түзсө, ушул жылдын биринчи айларында эле 7,8 миллионго жетти.
Ведомстводон белгилешкендей, өткөн жылы эмгек мигранттарына 43,4 млн сом төлөнбөгөн эмгек акысын алууга көмөк көрсөтүлгөн.
Мындан тышкары, өкүлчүлүктүн кызматкерлери өндүрүштө ден соолукка келтирилген зыян үчүн жумуш берүүчүлөрдөн 9,3 млн рубль өндүрүп алууга жардам беришти.
“24,2 миң кыргызстандык эмгек жана миграция мыйзамдары боюнча консультацияларды алышты, 4,1 миң жаран милдеттүү медициналык камсыздандыруу полисин алууга жардам беришти”, – деп айтылат маалыматта.
