Республика боюнча 509 миң абонентке акылдуу эсептегичтер акысыз орнотулду
Республика боюнча 1 млн 585 миң абоненттин 509 миңине акылдуу эсептегичтер акысыз орнотулду. Бул тууралуу “Кыргызстан улуттук электр тармагы” ААК Башкы директорунун коммерциялык маселелер боюнча орун басары Уларбек Дүйшө уулу “Биринчи радионун” түз эфиринен билдирди.
Анын айтымында, калк категориясы боюнча жалпысынан 425 миң акылдуу эсептегичтер 1-мартка карата акысыз орнотулуп бүткөн.
“Бүгүнкү күндө “Кыргызстан улуттук электр тармагы” ишканасы өлкө боюнча жалпысынан 1 млн 585 миң абонентти тейлейт. Анын 120 миң абоненти калк эмес категориядагы жеке өндүрүштүк ишкана-мекемелер. Ал эми 1 млн 465 миң калк категориясындагы абоненттер. Учурда өлкөдөгү санариптештирүү саясатынын негизинде “Менин жарыгым” тиркемеси иштелип чыгып, акыркы 2 жылдан бери бардык абоненттердин 98 пайызын толугу менен камтыды. Айрым абоненттер гана мүмкүнчүлүгүнө байланыштуу колдоно албай калбаса, негизинен толугу менен тиркеме иштеп жатат”, -деди Уларбек Дүйшө уулу.
Белгилей кетсек, “Менин жарыгым” тиркемеси ишке кирүү менен бир жылда 44 тонна кагаз же 10 млн сомдук кагаз үнөмдөлгөн.
“Акылдуу эсептегичтер орнотулган жерде кошумча кызматкерлерди кармабайбыз, система аркылуу бир айда бир жолу түзүлгөн график боюнча көрсөткүчтөрдү онлайн түрдө алабыз. Абонент канча электр энергиясын колдонгондугун автоматтык түрдө алып, тиркеме аркылуу маалымат жөнөтөбүз. Бардык дүмүрчөктөр тиркеме аркылуу онлайн түрүндө бардык абоненттерге жетет. Акылдуу эсептегичтерди орнотуу менен адам катышкан факторлорду жоюуга мүмкүнчүлүк түзүлдү. Мында абонент тиркеме аркылуу бир айда канча сомго электр энергиясын жаккандыгын билип турат. Оңдоо иштерине байланыштуу электр энергиясын өчүрүүлөр боюнча маалыматтарды да тиркеме аркылуу жөнөтүп турабыз”,- деди ал.
Маалымдалгандай, 2024-жылы өлкө боюнча жалпы 120 миң даана акылдуу эсептегичтер ар бир облустун бирден райондоруна толугу менен орнотулган.
