Нарында 15 жаңы социалдык жана өндүрүш объект ачылат
Бүгүн, 29-августта президент Садыр Жапаровдун катышуусунда Нарын облусунда жалпы 15 ири социалдык жана өндүрүш объекттин онлайн ачылышы өтөт. Бул тууралуу өкүлчүлүктөн билдиришти.
Маалыматка ылайык, даңыдан пайдаланууга бериле турган объекттердин катарына 7 социалдык мекеме жана 8 өндүрүш ишкансыа кирет. Алардын арасында мектептер, спорт залдар жана ишканалар орун алган.
Нарын шаарында Ү. Асанов атындагы лицей-интернат капиталдык ремонттон өткөрүлсө, Ак-Талаа районунда А.Турдакунов атындагы 150 орундуу жаңы мектеп, ошондой эле жүндү кайра иштетүүчү цех жана сафлор майын чыпкалоочу ишкана ишке киргизилүүдө.
Ат-Башы районунда Шах-Тал алтын казуу ишканасы, Жумгалда Таш-Дөбө айылындагы орто мектеп, Байзак айылындагы минералдык суу чыгаруучу цех жана Баш-Куугандыдагы жүндү иштетүүчү ишкана ачылууда.
Кочкор районунда Төлөк айылында спорт зал, Ак-Кыя айылында Ш. Рысмендеев атындагы мектеп, Ормон хан айылында соода-логистикалык комплекс пайдаланууга берилет.
Ал эми Нарын районунда Жер-Көчкү айылындагы Б. Кыязова атындагы орто мектеби, Ийри-Суу айылындагы М. Байдолотов атындагы мектеп, Миң-Булак айыл аймагындагы бетон заводу жана тоок этин кайра иштетүүчү ишкана ачылып жатат.
Бул объекттердин ишке кириши менен аймактардын социалдык инфраструктурасы чыңдалып, өндүрүштүк мүмкүнчүлүктөрү кеңейет жана жергиликтүү калк үчүн жаңы жумуш орундар түзүлөт.
