Найман жана Төрт-Күл суу сактагычтарынын сугат иштерине даярдыгы текшерилди
Ноокат районундагы Найман жана Баткен районунун Төрт-Күл суу сактагычтарынын сугат иштерине даярдыгы текшерилди. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Маалыматка ылайык, айыл чарба министри Бакыт Төрөбаев жогоруда аталган суу сактагычтардын абалын, алардын жазгы сугат иштерине болгон даярдыгын текшерген.
Атап айтканда, министр жазгы-жайкы сугат мезгилинде дыйкандарды суу менен үзгүлтүксүз камсыз кылуу зарылдыгын белгилеп, жетекчилерге көйгөйлөрдү өз убагында чечүү тапшырмаларын берген.
“Найман суу сактагычы Араван районунун Төө-Моюн айыл өкмөтүнүн 7785 гектарын суу менен камсыз кылат. Учурда суу берүүчү мунаранын ичиндеги кыймылдаткычта көйгөй жаралып, оңдоо иштери жүрүүдө. Бир жуманын аралыгында толугу менен оңдолуп бүтөт.
Ал эми Төрт-Күл суу сактагычы Баткен районунун 10 миң гектарга жакын жерин суу менен камсыз кылат. Жыйында суу сактагычты айланып өткөн каналды тазалоо тапшырмасы берилди”, – деп айтылат маалыматта.
