Президенттин Администрациясынын аппараттык жыйынында кезектеги 100 күндүк реформаларга кадам ташталды

Министрлер Кабинетинин Төрагасы – Кыргыз Республикасынын Президентинин Администрациясынын Жетекчиси Адылбек Касымалиевдин төрагалыгы алдында өлкөнүн орчундуу көйгөйлөрүн тез арада чечүүгө багытталган “Өкмөттүк акселераторлор” программасынын алкагында реформалардын кезектеги этабына кадам ташталды.

“Биз аппараттык жыйындарды өткөрүүнүн жаңы форматына өтүп жатабыз. 100 күндүк реформалар практикасы акселератор программасынын методологиясын колдонуу менен киргизилип жатат, бул актуалдуу маселелерди тез жана натыйжалуу чечүүгө мүмкүндүк берет”, – деп баса белгиледи Адылбек Касымалиев.

Жыйындын жүрүшүндө эки келечектүү милдет белгиленди: ири өлчөмдөгү жана оор салмактагы жүктөрдү ташуу үчүн атайын уруксат алуу жол-жобосун жөнөкөйлөтүү, ошондой эле айдоочулук күбөлүктү алуу үчүн зарыл болгон «083» медициналык справкасын алуу процессин жөнөкөйлөтүү.

Биринчи тапшырмага токтолсок, 2024-жылы өлкө ичинде жана эл аралык ташууларды кошкондо Кыргыз Республикасынын Транспорт жана коммуникациялар министрлиги тарабынан ири өлчөмдөгү жана оор салмактагы жүктөрдү ташууга 8256 атайын уруксат кагаз берилгени айтылды. Орто эсеп менен күнүнө 20га жакын ушундай транспорттук каражаттар өткөрмө бекеттерден өтөт.

“Учурда КР Мамлекеттик бажы кызматы таразага тартып, күбөлүк берип, аны айдоочу кагаз түрүндө Кыргыз Республикасынын Транспорт жана коммуникациялар министрлигине тапшырат. Андан соң ташуучулар ИИМдин Жол кыймылынын коопсуздугун камсыздоо башкы башкармалыгы (ЖКККББ)  Кыргыз Республикасынын “Улуттук электр тармактары” ААК менен Бишкекте жана Ош шаарында атайын уруксаат кагазын макулдашууга милдеттүү. Мындай «Колмо кол режими» процессти тездетүү аракеттери канчалык көрүлбөсүн, ал автоматташтырылган эмес бойдон калууда. Уруксат алуу үчүн ташуучу 8 этаптан, ал эми жүктүн бийиктиги 4,5 метрден ашса 10 этаптан өтүшү керек», – деди Адылбек Касымалиев маселенин негизги себеби катары ведомстволук маалыматтык түзүмдөрүнүн интеграциясынын жана электрондук бекитүү механизмин жоктугун белгиледи.

Бул көйгөйдү чечүү үчүн МинКаб башчысы 100 күндүн ичинде кызыкдар ведомстволордун маалыматтык тузүмдөрүн интеграциялоону камсыз кылуу жана атайын уруксаттарды координациялоонун электрондук механизмин толугу менен ишке киргизүү милдетин койду.

“Идеалдуулугунда – жүк ташуучу атайын уруксатты 30 мүнөттүн ичинде алышы керек. Биздин негизги максат – жүк ташуу процессин тездетүү, мамлекеттик органдардын ортосундагы координациялоо механизмдерин санариптештирүү, бюрократиялык тоскоолдуктарды жоюу жана логистикалык чыгымдарды азайтуу аркылуу ишкерлер үчүн жагымдуу шарттарды түзүү”, – деди Министрлер Кабинетинин башчысы.

Министрлер Кабинетинин Төрагасы экинчи тапшырмага токтолуп, айдоочулук күбөлүктү алууда милдеттүү талап болгон «083» медициналык справкасын алуунун жол-жобосун жөнөкөйлөтүү зарылдыгын белгиледи. Учурда бул процесс бир топ убакытты алат жана эмканадагы 8 адис дарыгерге кайрылуусун талап кылат.

“Бул процесс 7 күнгө чейин созулуп, жарандарга да, мамлекеттик органдарга да ыңгайсыздык жаратат. Кагаз түрүндө берилип, Транспорттук каражаттарды жана айдоочулук курамды каттоо боюнча мамлекеттик агенттикке өткөрүлүп берилген күбөлүктөрдү жасалмалоо коркунучу бар. 2024-жылы өлкө боюнча 175 миңге жакын жаран “083” күбөлүккө ээ болгон”, – деп белгиледи МинКаб башчысы.

Бул көйгөйдү чечүү үчүн МинКаб башчысы Саламаттыкты сактоо министрлигине жана Транспорттук каражаттарды жана айдоочулук курамды каттоо боюнча мамлекеттик агенттикке атайын санариптик модулдарды жана кызматтарды иштеп чыгууну жана ишке киргизүүнү, ошондой эле бул системалардын интеграциясын камсыздоону тапшырды.

«Медициналык текшерүүдөн өткөндөн кийин маалымкат автоматтык түрдө Агенттиктин маалымат базасына жөнөтүлүшү керек, бул аны кагаз түрүндө берүү зарылдыгын жокко чыгарат», – деп баса белгиледи Министрлер Кабинетинин төрагасы.

Бул милдеттердин аткарылышын координациялоо жана контролдоо Кыргыз Республикасынын Президентинин Администрациясынын тиешелүү түзүмдүк бөлүмдөрүнө жүктөлдү.

«Жыйынтыктарды 100 күндүн ичинде чыгаруу пландалууда», – деди ал.

Аппараттык жыйындын жүрүшүндө Каржы министри Алмаз Бакетаев Мамлекеттик бажы кызматынын жана Мамлекеттик салык кызматынын планынын аткарылышы боюнча маалымат берди.

«Салык жана бажы планы 100% аткарылды», – деди министр.

Өз кезегинде Министрлер Кабинетинин Төрагасы пландарды кыскартуу практикасы жокко чыгарылганын эскертип, «мындан ары пландарды көбөйтүү гана болоорун» баса белгиледи.

Жыйындын соңунда МинКаб Төрагасы министрлер кабинетинин жыйындарын видеоконференция форматына өткөрүүнү тапшырды.

“Жыйналыштарда баяндамачылар гана катышышы керек. Эсептөөлөр көрсөткөндөй, министрлер жыйын өтүүчү жерге барчу жана кайра артка кеткен жолдо бир нече саат убакыт коротушат. Мындай чечим жумуш убактысын үнөмдүү пайдалануу максатында кабыл алынды”, – деп сөзүн жыйынтыктады Адылбек Касымалиев.