Кыргызстандын тышкы соода жүгүртүүсү жыл башынан бери 983,8 млн долларды түздү
2025-жылдын январында республиканын тышкы жана өз ара соодасынын көлөмү 983,8 млн АКШ долларын түзүп, 2024-жылдын январь айына салыштырмалуу 17,8%га азайган. Бул тууралуу Бишкекте өткөн брифингде Улуттук статистикалык комитеттин төрагасынын орун басары Зайнидин Жумалиев билдирди.
Анын айтымында, экспорт 142,2 млн АКШ долларын түзүп, 2024-жылдын январь айына салыштырмалуу 24,7%га азайган. Ал эми импорттун көлөмү 2024-жылдын январь айына салыштырмалуу 16,5%га кыскарып, 841,6 млн АКШ долларын түздү. Соода жүгүртүүнүн түзүмүндө экспорт 14,5%ды, импорт 85,5%ды түздү.
«Республиканын соода жүгүртүүсүнүн жалпы көлөмүндө Евразия экономикалык биримдигине мүчө мамлекеттер менен өз ара соода 31,1%ды, анын ичинде экспортто 35,8%ды, импортто 30,7%ды түздү.
Кыргызстан менен ЕАЭБ өлкөлөрүнүн ортосундагы өз ара сооданын көлөмү 2025-жылдын январында 306,1 миллион АКШ долларын түзүп, 2024-жылдын январь айына салыштырмалуу 0,8%га азайган. ЕАЭБге мүчө мамлекеттердин ичинен республиканын өз ара соодасынын эң чоң үлүшү Россия (65%) жана Казакстан (33,1%) менен болгон», – деди ал.
Кошумчалангандай, үчүнчү өлкөлөр менен (ЕАЭБден тышкары) тышкы соода республиканын жалпы соода жүгүртүүсүнүн 68,9%ын, анын ичинде экспортто 64,2% жана импортто 69,7% түздү.
Үчүнчү өлкөлөр менен (ЕАЭБден тышкары) тышкы сооданын көлөмү 677,7 млн АКШ долларын түзүп, 2024-жылдын январь айына салыштырмалуу 23,8%га азайган.
