Кыргызстандын паспорту дүйнөлүк рейтингде позициясын жакшыртты
Кыргызстандын паспорту “Паспорт индекси” паспортторунун интерактивдүү рейтингиндеги позициясын 2023-2024-жылдары салыштырмалуу 14 пунктка жакшыртты.
Тышкы иштер министрлигинен билдиришкендей, үстүбүздөгү жылдын 6-мартына карата КР паспорту 67-орунду ээледи.
Ведомствонун маалыматына караганда, Кыргызстан тарабынан 2024-жылдын сентябрында Нью-Йорк шаарында БУУнун Башкы ассамблеясынын талааларында кол коюлган КР министрлер кабинети менен Албания, Черногория, Таиланд Королдугу, Венесуэла Боливардын өкмөттөрүнүн ортосундагы дипломаттык жана кызматтык паспорттордун ээлерин, ошондой эле Кипр Республикасынын – дипломаттык паспортторунун ээлерин визалык талаптардан бошотуу жөнүндө макулдашуулар ратификацияланганын билдирет.
Азыркы тапта чет мамлекеттер кыргызстандыктар үчүн визасыз режимди киргизүүнүн алкагында негизинен дипломаттык жана кызматтык паспорттордун ээлерине карата макулдугун беришүүдө, ошол эле учурда визасыз режимди этап-этабы менен киргизүү жалпы жарандык паспорттордун ээлери үчүн визасыз сапарларды кеңейтүүнүн кийинки кадамы болуп жарандарга чоң өбөлгө түзөөрүн белгилей кетүү керек.
Дипломаттык жана кызматтык паспорттордун ээлери үчүн визасыз жүрүү жөнүндө кол коюлган макулдашуулардын санын көбөйтүү боюнча Министрликтин ырааттуу иши жалпы жарандык паспорттун статусун жогорулатууга шарт түзөт. Бул өз кезегинде жалпы жарандык паспорттордун ээлерине визалык талаптарды андан ары жөнөкөйлөтүүгө түздөн-түз таасирин тийгизет.
Ошентип, Кыргызстандын паспорту “Паспорт индекси” паспортторунун интерактивдүү рейтингиндеги позициясын 2023-2024-жылдары салыштырмалуу 14 пунктка жакшыртты. Үстүбүздөгү жылдын 6-мартына карата Кыргызстандын паспорту 67-орунда турат.
Министрлик КР жарандарынын чет өлкөгө чыгуу сапарлары үчүн жагымдуу шарттарды түзүүгө багытталган иштерди улантат.
