Быйыл 1 млн 22 миң гектар жерди сугарууга 6,8 млрд куб метр суу берилет

2025-жылга карата 1 млн 22 миң гектар сугат айдоо жерлерин 4-5 жолу сугаруу үчүн 6,8 млрд куб метр суу берүү пландалды. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.

Ведомствонун маалыматы боюнча, 20 миң гектар аянтка тамчылатып жана жамгырлатып сугаруу системасы орнотулат.

Ошондой эле Суу ресурстары кызматынын түзүмдүк бѳлүмдѳрү тарабынан жазгы ным топтоо сугатында республика боюнча 270 миң гектар жерди сугаруу мерчемделди. Бүгүнкү күндө Ош, Баткен жана Жалал-Абад облустарында ным топтоо сугатында 19 миң гектардан ашык жер сугарылды. Калган облустарда сугат март айынын экинчи жана үчүнчү декадасында башталат.

Ным топтоо сугаты өсүмдүктөрдүн вегетация мезгилинин башында көп өлчөмдө суу алуу ыкмасы болуп саналат. Бул алардын айрыкча кургакчылык же жаан-чачын аз болгон мезгилде өсүшүн жакшыртат жана тез-тез сугарууга болгон муктаждыкты азайтат. Нымдуу сугаруу жашылча өсүмдүктөрү, жемиш бактары жана көп жылдык өсүмдүктөр үчүн өтө пайдалуу.

Белгилей кетсек, буга чейин Суу ресурстары кызматынын түзүмдүк бөлүмдөрү тарабынан 180 чакырымдай чарба аралык каналдарды тазалоо иштери аткарылганы айтылган. Ушул жылга карата ирригация объекттерин калыбына келтирүү жана оңдоо иштерине мамлекеттик бюджеттен 4,8 млрд сом, таза суу объекттерин курууга 2 млрд сом өлчөмүндө каржылоо каралууда.

Бул каражатка 500 чакырым каналды оӊдоо жана тазалоо, 500 миң чарчы метрди түзгөн каналга бетон төшөө, 755 гидротехникалык курулманы, 200 суу өлчөөчү постту, 91 насостук станцияны, 156 насостук агрегатты оңдоо жана калыбына келтирүү, 40 насостук агрегатты жаңылоо, 272 чакырым коллектордук-дренаждык системаны тазалоо пландалды.