Бишкекте 2030-жылга чейин Улуттук өнүктүрүү программасынын долбоору талкууланды

Күн мурун Бишкекте 2030-жылга чейинки Улуттук өнүктүрүү программасынын долбоору талкууланды. Бул тууралуу Экономика жана коммерция министрлигинен билдиришти.

Иш-чарага президенттин администрациясынын өкүлдөрү, Жогорку Кеңештин депутаттары, мамлекеттик органдар, жарандык коом, илимий чөйрө, көзкарандысыз эксперттер жана эл аралык өнөктөштөр катышты.

Жолугушууда программа боюнча иш уланууда жана Экономика министрлиги жарандардын сунуштарын күтүп жатканы айтылды.

Улуттук программа – индустриялаштыруу, транспорттук инфраструктура жана санариптештирүүдөн тартып экология, маданият жана социалдык саясат маселелерине чейин өлкөнү өнүктүрүүнүн негизги багыттарын аныктайт.

Ошондой эле жаңы жумуш орундарын түзүү, инновациялык технологияларды киргизүү, билим берүү жана саламаттык сактоо системасын модернизациялоо, экономиканын атаандаштыкка жөндөмдүүлүгүн жогорулатуу боюнча чаралар талкууланууда.

“Ар бир жаран бул процесске өз салымын кошо алат жана айтылган ой-пикирлер жана сунуштар программага өзгөртүүлөрдү киргизүүдө эске алынат. Жарандар өз сунуштарын stratplan@mineconom.gov.kg дарегине жөнөтө алышат”, – деп айтылат маалыматта.