Бажыдагы мыйзам бузуулардан 277 млн сом зыян өндүрүлдү
2026-жылдын биринчи кварталында Кыргызстандын бажы тармагындагы кылмыш фактылары боюнча мамлекетке келтирилген 277,5 млн сом өлчөмүндөгү зыяндын орду толтурулду. Бул тууралуу Мамлекеттик бажы кызматынын кеңешмесинде белгилүү болду.
Маалыматка ылайык, отчеттук мезгилде бажы мыйзамдары чөйрөсүндө жалпысынан 4 861 укук бузуу жана кылмыш фактысы аныкталган. Анын ичинен 143 материал кылмыш белгилери менен катталып, алардын алкагында жогорудагы суммадагы зыян өндүрүлгөн.
Ошондой эле бюджетке жалпысынан 518,5 млн сом кошумча каражат түшкөн. Ал эми 4 718 укук бузуу иши боюнча 36,7 млн сом айып өндүрүлгөн. Бул аралыкта 204,2 млн сомдон ашык төлөмдүн түшүүсү камсыз кылынган.
Мындан тышкары, баңгизаттардын контрабандасына каршы күрөшүү алкагында 20 факты аныкталып, мыйзамсыз жүгүртүүдөн 28 кг ашык баңгизат жана 1 тоннага жакын прекурсорлор алынган.
Кеңешменин жыйынтыгында контрабандага каршы күрөштү күчөтүү жана укук коргоо ишмердүүлүгүнүн натыйжалуулугун мындан ары да жогорулатуу тапшырмасы берилди.
