Бакыт Төрөбаев Казакстандын айыл чарба министри менен жолукту

Министрлер кабинетинин төрагасынын орун басары — суу ресурстары, айыл чарба жана кайра иштетүү өнөр жай министри Бакыт Төрөбаев Казакстандын Айыл чарба министри Айдарбек Сапаров менен жолукту.

Жолугушуунун жүрүшүндө тараптар айыл чарба тармагындагы эки тараптуу кызматташуунун актуалдуу маселелерин, анын ичинде соода мамилелерин жана инвестициялык долбоорлорду өнүктүрүүнү талкуулашты.

Бакыт Төрөбаев айыл чарба тармагында эки өлкөнүн өнөктөштүгүн чыңдоонун маанилүүлүгүн айтып, айыл чарба продукциясын кайра иштетүү, жеткирүү түйүндөрүн өнүктүрүү жана заманбап технологияларды киргизүү жаатында биргелешкен иштердин олуттуу потенциалын белгиледи.

Айдарбек Сапаров өз кезегинде Казакстан Кыргызстан менен айыл чарба тармагында кызматташууну мындан ары өнүктүрүүгө даяр экенин ырастап, тажрыйба алмашуунун жана биргелешкен долбоорлорго инвестиция тартуунун маанилүүлүгүн белгиледи.

Жолугушуунун жүрүшүндө ошондой эле макулдашууларды ишке ашыруу боюнча далилдүү кадамдар, анын ичинде айыл чарба продукцияларын жеткирүү жана казак инвесторлорунун Кыргызстандын айыл чарба тармагын өнүктүрүү долбоорлоруна катышуусу талкууланды.

Жолугушуунун жыйынтыгында тараптар айыл чарба тармагындагы кызматташууну чыңдоо Кыргызстан менен Казакстандын ортосундагы эки тараптуу мамилелердин мындан аркы өнүгүшүнө өбөлгө болоруна ишенимин билдиришти.