Америкалык журнал Караколду – Борбор Азиянын саякат борбору деп атады
Америкалык Condé Nast Traveler журналы Каракол — Борбор Азиянын саякат борбору деп жарыялады. Бул тууралуу Экономика жана коммерция министрлигинен билдиришти.
Ошентип, Ысык-Көлдүн бермети — Каракол – аталган журналдын “2025-жылы барчу 25 мыкты жер” тизмесине кирди. Авторлор аны “Борбор Азиядагы кызыктуу саякаттардын борбору” деп аташкан.
Эмне үчүн Каракол?
Теңир-Тоонун сүрдүү тоо кыркасынын этегиндеги Каракол жылдын бардык мезгилинде жигердүү эс алууну жактыргандарды өзүнө тартып турат:
- жайында — жөө жүрүштөр, кайыкта сүзүү, ат минүү жана параплан менен уча берүү;
- кышында — эң сонун лыжа жолдору жана көздүн жоосун алган карлуу көрүнүштөр.
“Каракол” лыжа базасы деңиз деңгээлинен 1,8 миля бийиктикте жайгашкан жана Борбор Азиядагы эң бийик курорт болуп саналат. “Үч чоку” деп аталган жаңы лыжа базасы лыжачылар менен сноубордчулардын сүйүктүү жайына айланат деп күтүлүүдө.
Жетүү жеңилдей түштү
Журналда айтылгандай, эл аралык аэропорт ачылган соң Караколго жетүү кыйла жеңилдеди. Жай мезгили (июнь-сентябрь) треккинг жана экскурсиялар үчүн эң ыңгайлуу болсо, кышкы сезон (декабрь-апрель) карлуу жантаймаларда спортту сүйгөндөрдү кубандырбай койбойт.
Салттар жана маданият
Condé Nast Traveler туристтерге кыргыз салттарын сезүү үчүн Happy Nomads Yurt Camp жана Arista Travel Yurt Camp сыяктуу боз үй лагерлерине токтоону сунуштайт. Караколдун дагы бир өзгөчөлүгү — анын көп улуттуу калкы. Бул жерде уйгурлар, өзбектер, кыргыздар, калмактар, дунгандар жана орустар тынчтыкта жашап келишет. Шаардын символдору катары жыгачтан жасалган кооз үйлөр, 1907-жылы курулган Дунган мечити жана суусундук берген ашлян-фу тамагы көрсөтүлгөн.
Condé Nast Traveler журналы 1987-жылдан бери жарык көрүп келет жана дүйнөдөгү эң кадыр-барктуу саякат басылмаларынын бири болуп эсептелет. Анын сунуштары саякат тренддерин аныктап, миллиондогон туристтерди жаңы ачылыштарга шыктандырат.
