Амангельдиев ЕЭК Кеңешинин кезектеги жыйынына катышты

Министрлер Кабинетинин Төрагасынын биринчи орун басары Данияр Амангельдиев Евразия экономикалык комиссиясынын Кеңешинин видеоконференция форматындагы жыйынына катышты. Жыйындын жүрүшүндө 18 маселе каралып, анын 13ү талкуусуз кабыл алынды. Атап айтканда, ЕЭК Кеңеши ЕАЭБ менен Индонезиянын ортосундагы эркин соода жөнүндө макулдашууну ишке ашыруу боюнча иш-чаралардын планын бекитти.

Мүчө мамлекеттерге макулдашуунун тез арада күчүнө кириши үчүн ички мамлекеттик жол-жоболорду тездетүү сунушталды. Ошондой эле ЕАЭБдин «Лакокраска материалдарынын коопсуздугу жөнүндө» техникалык регламенти жөнүндө чечим кабыл алынды. Кыргызстан үчүн документ 2032-жылдын 1-январынан тарта күчүнө кирет, бул ата мекендик өндүрүүчүлөргө жаңы талаптарга ыңгайлашууга мүмкүндүк берет. Мындан тышкары, ЕЭК Кыргыз Республикасына өнөр жайлык кайра иштетүү үчүн 300 тоннага чейинки көлөмдөгү какао порошогун жана какаосу бар даяр тамак-аш азыктарын алып кирүүгө тарифтик жеңилдиктерди берди.

Бул кондитердик өнөр жайды өнүктүрүү үчүн кошумча шарттарды түзөт. ЕЭК Кеңеши ошондой эле ЕАЭБ өлкөлөрүндө спорттук тамактанууну маркалоонун бирдиктүү эрежелерин бекитти, бул маркалоо коддорун өз ара таанууну камсыздайт жана Биримдиктин рыногунда продукциянын жүгүртүлүшүн жөнөкөйлөштүрөт. Тышкы экономикалык кызматташтыкты кеңейтүү маселелерине өзгөчө көңүл бурулду. ЕЭК Кеңеши Пакистан менен эркин соода жөнүндө макулдашууга жетишүү мүмкүнчүлүгүн изилдөө боюнча изилдөө тобун түзүүнү жактырды, бул кыргыз продукциясынын экспортун көбөйтүү үчүн келечекти ачат. Мындан тышкары, ЕЭК Коллегиясы 2030-жылдын аягына чейин LED-лампаларга импорттук алымдарды 0%дан 5%га чейин жогорулатуу жөнүндө чечим кабыл алды.