Акылбек Жапаров: Конституция өлкөбүздүн эгемендүүлүгүнүн жана мамлекеттик бүтүндүгүнүн негизи

Кыргыз Республикасынын Жогорку Кеңешинде Кыргыз Республикасынын биринчи Конституциясынын кабыл алынгандыгынын 30 жылдыгына арналган иш-чарада Министрлер Кабинетинин Төрагасы – Кыргыз Республикасынын Президентинин Администрациясынын Жетекчиси Акылбек Жапаров сөз сүйлөдү.

Иш-чара республиканын негизги мыйзамынын кабыл алынуу жана өнүгүү тарыхын көрсөткөн тасма менен башталды.

Министрлер Кабинетинин Төрагасы сөз сүйлөп жатып, кыргызстандыктарды жана Жогорку Кеңештин депутаттарын дагы бир жолу Кыргыз Республикасынын Конституциясынын кабыл алынгандыгынын 30 жылдыгы менен куттуктады.

«1990-жылы апрелде «легендарлуу парламенттин» депутаттары шайланып, 1993-жылдын 5-майында өлкөбүз эгемендүү мамлекет катары Кыргыз Республикасынын биринчи Конституциясын расмий түрдө кабыл алган», – деп белгиледи Акылбек Жапаров.

МинКаб башчысы «Өлкөнүн башкы мыйзамында эгемендүүлүктүн, эл бийлигинин, өлкөнүн аймактык бүтүндүгүнүн, мыйзамдуулуктун жана демократиянын принциптери бекемделгенин» баса белгиледи.

«Конституция өлкөбүздүн эгемендүүлүгүнүн жана мамлекеттик бүтүндүгүнүн негизи. Мамлекетибиздин башында кыргыз элинин бийик деми турат. Демек, кайсы доордо болбосун Конституциянын негизги өзөгү эркин эл жана анын жыргалчылыгы болгон жана болуп кала берет», – деди МинКаб Төрагасы.

МинКаб башчысы глобалдык коронавирустук пандемияга, соода-экономикалык каатчылыктарга, экономиканы өнүктүрүүгө багытталган жагымсыз чараларды көрүү менен байланышкан оор мезгилдерге карабастан, мамлекет өнүгүүнүн ишенимдүү жолуна түшө алганын кошумчалады.

«Биз Кыргызстаныбызды гүлдөгөн мамлекетке айландырууга умтулабыз. Ал эми Президент белгилегендей, Конституциябыз улуттук жана мамлекеттик көз карандысыздыктын жана демократиялык өнүгүүнүн символу болуп кала берсин», – деп жыйынтыктады Акылбек Жапаров.