Ак илбирстин логотибин иштеп чыгуу боюнча сынак жараксыз деп табылды
Кыргыз Республикасынын мамлекеттик символу болгон ак илбирстин логотипинин эң мыкты дизайнын тандоого жооптуу сынак комиссиясы сынакты жараксыз деп табуу чечимин кабыл алды. Сынакты өткөрүү жөнүндө жобонун 12-пунктунда айтылгандай, уюштуруучулар зарыл болгон учурда сынакты каалаган этапта жокко чыгаруу же өзгөртүү укугун өзүнө калтырат.
Сынакка келген бардык иштерди кылдат карап чыгып, сынак комиссиясынын мүчөлөрү долбоорлордун бири да өлкөнүн мамлекеттик символуна коюлган жогорку талаптарга толук жооп бербейт деген жыйынтыкка келишкен.
“Бирок берилген концепциялардын бири да Кыргызстандын улуттук байлыгы катары ак илбирстин образынын толук тереңдигин, символикалуулугун жана ар тараптуулугун чагылдыра алган жок”. «Бизге Кыргызстандан да, чет өлкөлөрдөн да таланттуу дизайнерлерден 200дөн ашык чыгармачыл жана кызыктуу иштерди алдык, – деп белгиледи сынактык комиссиянын төрагасы, Кыргыз Республикасынын Жаратылыш ресурстары, экология жана техникалык көзөмөл министринин биринчи орун басары К.Касейинов.
Кыргыз Республикасынын Жаратылыш ресурстары, экология жана техникалык көзөмөл министрлиги бардык катышуучуларга кызыгуусу жана чыгармачылык мамилеси үчүн ыраазычылык билдирет. Сынак өз максатына жетпесе да, сунушталган эмгектер улуттук дизайнды өнүктүрүүгө баалуу салым болуп, ак илбирсти сактоо боюнча маанилүү маселеге коомчулуктун көңүлүн бурат.
Сынактык комиссия бардык күтүүлөргө жана талаптарга жооп бере турган логотип түзүү боюнча кийинки кадамдарды аныктоо үчүн дизайн жана экология тармагындагы эксперттер менен кошумча консультацияларды өткөрүүнү пландаштырууда.
