Айыл чарба министрлиги жыл жыйынтыгын чыгарды

Суу ресурстары, айыл чарба жана кайра иштетүү өнөр жайы министрлигинин бүгүнкү жыл жыйынтыгы чыгарылган жыйынында министрликтин былтыркы жылдагы аткарган иштери, ветеринардык кызматтын жана айыл чарба өсүмдүктөрүн экспертизалоо департаментинин ишмердүүлүгү, ошондой эле алдыдагы милдеттер каралды. Араван, Нарын, Түп, Жайыл, Лейлек, Айтматов, Ноокен райондорунда министрлик койгон беш артыкчылыктуу багыты боюнча аткарылып жаткан иштер боюнча отчеттор угулду.

Жалпысынан 2024-жылы министрилик  тарабынан агроөнөр жай секторун өнүктүрүү максатында 178 ченемдик укуктук акт иштелип чыгып, анын 117си кабыл алынган. Алардын ичинде 7 мыйзам, 6 Президенттин Жарлыгы, 1 Жогорку Кеңештин токтому, 47 Министрлер Кабинетинин токтому жана 56 тескеме кабыл алынган.

Айыл чарба продукциясынын дүң чыгарылышы 395,6 млрд сомду түзүп, өткөн жылга салыштырмалуу 13,6 млрд сомго көбөйдү. Мал чарба продукциясы 11,5 млрд сомго, өсүмдүк өстүрүүчүлүк 1,4 млрд сомго өстү. Тамак-аш жана кайра иштетүү өнөр жайынын өндүрүшү 87,3 млрд сомду түзүп, өсүү 120,1% болду.

Агроөнөр жай продукцияларынын экспорту 38,5 млрд сомго жетип, анын ичинде тамак-аш жана кайра иштетүү өнөр жайынын экспорту 21,6 млрд сомду түзүп, былтыркыга салыштырмалуу 17,4% көбөйдү. Айыл чарба продукцияларынын импорту 107,5 млрд сомду түзүп, 3,3% жогорулады.

“Айыл чарбасын каржылоо-12” программасынын алкагында 4,86 млрд сомго 12 108 насыя берилсе, “Агроөнөр жай комплексин кредиттөө” программасы аркылуу 2 762 субъектке 7,3 млрд сом бөлүндү.

Ирригация тармагына республикалык бюджеттен 5,65 млрд сом каралып, 97,1% өздөштүрүлдү. Капиталдык оңдоо иштерине 924 млн сом бөлүнүп, 96,4% аткарылды. Бул каражатка 626 км канал, 596 гидротехникалык курулма, 250 суу өлчөөчү пост, 115 насостук станция, 221 насостук агрегат оңдолуп, 30 агрегат жаңыртылды, ошондой эле 150 км коллектордук-дренаждык система тазаланды. Айыл чарба тармагын техникалык жабдуулар менен камсыздоо максатында 366,7 млн сом бөлүнүп, 104 атайын техника алынган.
2024-жылы 40 айылда ичүүчү суу тутумдары курулуп, 136 623 айыл тургуну таза суу менен камсыздалды. Жаздык үрөн менен камсыздоо 97,3% аткарылып, кылкандуу дан эгиндери боюнча керектелген 66,8 миң тоннанын 65,4 миң тоннасы даярдалды. Күздүк эгин себүүгө 99% үрөн топтолуп, анын ичинде күздүк буудай 98,9% камсыздалды.

Ветеринардык кызмат тарабынан 86 131 баш уй, 16 011 баш кой уруктандырылды. Республика боюнча 712,5 миң баш бодо мал, 32,6 миң баш жылкы, 8,6 миң баш чочко идентификацияланып, ЖИКС системасына киргизилди. Мал базарлар жана мал союучу жайлар көзөмөлгө алынып, ветеринардык эмдөөлөр үчүн керектүү биокаражаттар жеткирилди.

Балык чарбасын өнүктүрүү боюнча 2024-жылдын 1-октябрына карата жаңы 35 чарба түзүлүп, жалпы көлөм 28,8 млн даана балыкка жетти. Балык өндүрүү 17 377 тоннаны түзүп, өткөн жылга салыштырмалуу 5 787 тоннага азайды. Ошол эле учурда, балык экспорту 1 765 тоннаны түздү.

Коллегиянын жыйынтыгы менен министрликтин алдындагы структуралык бөлүмдөргө тиешелүү тапшырмалар коюлду. Суу ресурстарын башкаруу, үрөн, көчөт, урук материалдары менен камсыздоо, кайра иштетүү өнөр жайы, азык-түлүк коопсуздугу, кооперация, МТСтерди уюштуруу, экспортту арттыруу, илим, билим, айыл чарба субъекттеринин билим деңгээлин жогорулатуу жана тажрыйба алмашуу боюнча бир катар конкреттүү чечимдер кабыл алынды.