Соода-өнөр жай палатасы баткендик ишкерлер менен кызматташууну күчөтөт
КР Соода-өнөр жай палатасынын (СӨП) Баткен облусу боюнча өкүлү Данияр Абдуллаев Кызыл-Кыя шаарынын прокуратурасынын жана салык кызматынын өкүлдөрү менен эки өлкөнүн ортосундагы кызматташтыкты чыңдоо максатында жолугушуу уюштурду. Бул тууралуу уюмдун басма сөз кызматынан билдиришти.
Иш-чаранын жүрүшүндө Соода-өнөр жай палатасынын өкүлдөрү уюм тууралуу кеңири маалымат берип, ишкерликти колдоо мүмкүнчүлүктөрүн талкуулашты.
“Жакынкы арада бизнестин, мамлекеттик органдардын жана Соода-өнөр жай палатасынын кеңири жыйыны өтөт”, – деп айтылат маалыматта.
Мындан тышкары, палатанын Баткен өкүлчүлүгүнүн директору Кызыл-Кыя шаарынын акими Асылбек Маткалыков жана шаардык кеңештин төрагасы Жыргалбек Калматов менен Соода-өнөр жай палатасынын кызматташуусун бекемдөө максатында жолугушууларды өткөрдү.
