Кыргызстан жана Афганистандын бизнес-коомчулуктарынын ортосунда ишкердик жолугушуу өттү
Кыргызстандын жана Афганистандын бизнес-коомчулуктарынын ортосунда ишкердик жолугушуу болуп өттү, деп билдирет КР Экономика жана коммерция министрлигинин басма сөз кызматы.
Жолугушуу 25-январда Афганистандын Соода-инвестициялык палатасынын аянтында өтүп, анын жүрүшүндө экономикалык маселелерге жана бул өлкөлөрдүн бизнес чөйрөсүнүн өз ара аракеттенүү потенциалына басым жасалды.
Ооганстандын соода-өнөр жай палатасынын башчысынын милдетин аткаруучу Мохаммад Юсуф Моманд эки өлкөнүн бизнес коомчулугунун ортосунда тыгыз байланыштарды түзүү зарылдыгын белгиледи. Ал бизнеске көпүрө түзүүгө көмөктөшүүгө жана эки тараптын ишкерлеринин тажрыйба жана маалымат алмашуусуна ортомчу болууга даяр экенин билдирди.
Жолугушуунун жүрүшүндө бизнес-коомчулуктун өкүлдөрү айыл чарба продукциялары, өнөр жай товарлары, текстиль жана тигүү жана башка тармактарда кызматташуунун келечеги тууралуу маалымат алмашышты.
Ооган бизнес чөйрөсүнүн өкүлдөрү Кыргызстандан электр лампалары, фармацевтика, кант, буурчак өсүмдүктөрү, кездемелер жана башка товарлар сыяктуу товарларды импорттоого кызыкдар экендигин билдиришти.
Иш-чара эки өлкөнүн ортосундагы ишкердик мамилелерди өнүктүрүүнүн башталышы катары бааланып, бизнес-коомчулуктар мындан аркы тажрыйба алмашууга жана өз ара экономикалык өнүгүүнү колдоо боюнча демилгелерге даяр экендиктерин билдиришти.
