Бишкекте КМШ Парламенттер аралык ассамблеясынын күзгү сессиясы аяктады

Көз карандысыз мамлекеттер шериктештигине мүчө өлкөлөрдүн Парламенттер аралык ассамблеясынын күзгү сессиясынын алкагында Бишкекте өтүп жаткан КМШ ПААнын 56-пленардык жыйыны өз ишин жыйынтыктады.

Эске сала кетсек, күзгү сессиянын ишине Азербайжан Республикасынын, Армения Республикасынын, Беларусь Республикасынын, Казакстан Республикасынын, Россия Федерациясынын, Тажикстан Республикасынын жана Өзбекстан Республикасынын парламенттик делегациялары катышты.

16-17-ноябрь күндөрү күзгү сессиянын алкагында КМШ ПАА Кеңешинин отуруму, КМШ ПААнын 56-пленардык жыйыны, КМШ Жаштар Парламенттер аралык ассамблеясынын жыйыны болуп өттү. Ошондой эле, КМШ ПААнын саясий маселелер жана эл аралык кызматташтык, социалдык саясат жана адам укуктары боюнча туруктуу комиссиялары иш алып барды.

Мындан тышкары, Шериктештикке кирген өлкөлөрдүн парламент башчылары жана депутаттары Кыргыз Республикасынын Жогорку Кеңешинин 85 жылдыгына, ошондой эле көрүнүктүү кыргыз жазуучусу Чыңгыз Айтматовдун 95 жылдыгына арналган эл аралык конференцияларга катышты.