Саламаттыкты сактоо тармагын реформалоонун кийинки этабы башталды

Кыргыз Республикасынын Президентинин Администрациясынын аппараттык жыйынында, Кыргыз Республикасынын Министрлер Кабинетинин Төрагасы – Кыргыз Республикасынын Президентинин Администрациясынын Жетекчиси Адылбек Касымалиев “Өкмөттүк акселераторлор” программасынын алкагында жаңы реформа башталганын жарыялады. Бул реформа калк үчүн кепилденген медициналык кызматтардын жеткиликтүүлүгүн жогорулатууга багытталган.

Адылбек Касымалиев өз сөзүндө Кыргызстандын жарандарынын саламаттыгын жана бакубаттуулугун камсыз кылуу үчүн бул багыттын маанисин белгиледи. Ал белгилегендей, саламаттыкты сактоо тармагындагы мамлекеттик кепилдиктер программасы бир топ убакыттан бери иштеп келе жатат жана ар бир жаранды мамлекеттин эсебинен медициналык кызматтын кепилденген көлөмү менен камсыздоого багытталган. Бирок, олуттуу каржылоого карабастан, калктын маалымдуулугунун жетишсиздигинен программанын натыйжалуулугу чектелүү бойдон калууда.

“Моюнга алышыбыз керек, көптөгөн жарандар Мамлекеттик кепилдиктер программасы тарабынан көрсөтүлүүчү акысыз жана субсидияланган медициналык кызматтарга болгон укуктарын билишпейт. Бул адамдардын бекер көрсөтүлүшү керек болгон кызматтар үчүн акы төлөөгө жана жеке клиникаларга кайрылууга мажбур болушуна алып келет, бул үй-бүлөлөргө кошумча каржылык жүктү жаратат”, – деди ал.

Адылбек Касымалиев ошондой эле жарандардын жаш курагына, социалдык абалына, медициналык көрсөткүчтөрүнө жана камсыздандыруусуна жараша алар укуктуу медициналык кызматтар тууралуу маалыматты оңой алууга мүмкүндүк берүүчү бирдиктүү, жекелештирилген инструменттин жоктугун белгиледи.

Негизги көйгөй, Министрлер Кабинетинин Төрагасынын айтымында, жарандардын көптөгөн категорияларын жана юридикалык тилде сүрөттөлгөн медициналык жардамдын түрлөрүн камтыган Мамлекеттик кепилдиктер программасынын комплекстүү түзүмү, жарандардын саламаттыкты сактоо тармагындагы, өзгөчө алыскы региондордогу укуктары боюнча жеткиликтүү маалымат булактарынын жоктугу, ошондой эле маалыматтын бытырандылыгы, бейтаптарды ар кандай булактардан издөөгө мажбурлоо.

Бул көйгөйдү чечүү үчүн МинКаб Төрагасы “Саламаттык укугу” санариптик кызматын ишке киргизүүнү тапшырды, аны 100 күндүн ичинде ишке ашыруу керек.

“Биздин милдет – ар бир жаран өз укуктарын так билип, мамлекет кепилдеген кызматтарды толук пайдалана алышы үчүн. “Саламаттык кугу” санариптик кызматы жарандарга кандай медициналык кызматтарды бекер же жеңилдетилген шарттарда ала алат деген суроого жеке жана так жооп берген заманбап инструмент болуп калат”, – деди Адылбек Касымалиев.

Ал кошумчалагандай, бул санариптик сервис Tunduk мобилдик тиркемесине интеграцияланып, ар бир жаранга жеткиликтүү болот, бул ар кандай булактардан маалыматты издөөнүн же консультацияларга убакыт коротуунун зарылдыгын болтурбоо менен өзүнүн медициналык укуктары жана кызматтары тууралуу жекелештирилген маалыматты ыкчам алууга мүмкүндүк берет.

Жыйынтыгында Адылбек Касымалиев бул долбоор 100 күндүн ичинде ийгиликтүү ишке ашаарына ишенимин билдирип, анын Кыргыз Республикасынын жарандарынын жашоо сапатын жакшыртуу үчүн маанилүүлүгүн белгиледи.