Өлкөдө окуучулардын билим деңгээлин текшерген PISA-2025 тестирлөөсү старт алды
Бүгүнтөн тарта өлкөдө PISA-2025 – окуучулардын билим жетишкендиктерин эл аралык баалоо программасы старт алды.
Билим берүү жана илим министрлигинен билдиришкендей, тестирлөө 30-апрелге чейин уланат.
Маалыматка ылайык, тестирлөөгө өлкөдөгү 197 мектептен 6700дөн ашуун окуучу катышат. Буга карата Билим берүүнүн сапатын өнүктүрүү департаменти 14 мобилдик топ түздү. Алардын ар биринде координатор, IT адиси, тестирлөөнүн администратору жана айдоочу бар. Процессти жөнгө салуу жана башкаруу үчүн 308 ноутбук даярдалды. Ар бир окуучу үчүн уникалдуу логин жана сыр сөздөрдү түзүүчү Maple системасы иштелип чыкты. Бул тестирлөөнүн купуялуулугун жана тактыгын камсыздайт.
“PISA (Programme for International Student Assessment, PISA) – окуучулардын билим жетишкендиктерин баалоонун эл аралык программасы. Тестке дүйнөнүн ар бурчунан 15 жаштагы окуучулар катышат. PISA окуучулардын функционалдык сабаттуулугун, мектепте алган билимин практикада колдонуу жөндөмдүүлүгүн жана балдардын коомдо өз алдынча жашоого даярдыгын баалайт. Ал эми Кыргызстан үчүн эл аралык кызматташуу жана тажрыйба алмашуу мүмкүнчүлүктөрүн түзөт. Материалдарды которуу, адаптациялоо, тандоо жана даярдоо жол-жоболору, ошондой эле дүйнөлүк эксперттер менен иштөө Кыргызстанга глобалдык билим берүү коомчулугуна интеграцияланууга жана эл аралык деңгээлде өз позициясын баалоого шарт түзөт”, – деп айтылат маалыматта.
Тестирлөө министрликтин координациясы жана Дүйнөлүк банктын “Келечек үчүн билим берүү” долбоорунун каржылык колдоосу менен жүргүзүлөт.
