ЖК депутаттарын мөөнөтүнөн мурда шайлоо: 3 талапкерден арыз түштү
КР Шайлоо жана референдум ѳткѳрүү боюнча борбордук комиссиясына № 2 Баткен бир мандаттуу шайлоо округу жана № 9 Кара-Суу бир мандаттуу шайлоо округу боюнча КР Жогорку Кеңешинин жетинчи чакырылышынын депутаттарын мөөнөтүнөн мурда шайлоого катышууга талапкерлерден арыздар түшө баштады.
БШКнын басма сөз кызматынан билдиришкендей, Кара-Суу бир мандаттуу шайлоо округу боюнча талапкерликке кѳрсѳтүү (ѳзүн ѳзү кѳрсѳтүү тартибинде) ниети жѳнүндѳ талапкер Бакир Бакытбектен арыз келип түшкѳн. Ал 1961-жылы туулган, пенсионер.
Белгилей кетсек, бул Жогорку Кеңештин депутаттарын мөөнөтүнөн мурда шайлоого катышууну каалаган үчүнчү талапкер.
Эскерте кетсек, КР президенти жогоруда аталган бир мандаттуу эки шайлоо округу боюнча Жогорку Кеңештин депутаттарын мөөнөтүнөн мурда шайлоону 2024-жылдын 28-апрелине дайындаган. Депутаттыкка талапкерлерди кѳрсѳтүү 2024-жылдын 26-мартында аяктайт.
