УКМК жасалма виза даярдоо каналын токтотту

Мыйзамсыз миграция каналдарын аныктоо, алдын алуу жана бөгөт коюу боюнча жүргүзүлүп жаткан активдүү иштердин алкагында Бангладештин Х.М.М. аттуу жараны аныкталып, ал мекендештерине акчалай сыйлык үчүн жасалма документтерди даярдоо жана сатуу боюнча туруктуу канал уюштурган.

Алсак, үстүбүздөгү жылдын февраль айында Х.М.М. Кыргызстандын аймагында эмгек мигранттарын легалдаштыруу үчүн 66 500 АКШ доллары өлчөмүндө акча каражатын алып, материалдык пайда алуу максатын көздөп, жасалма уруксат берүүчү документтерди жасап, мекендештерине жөнөткөн.

УКМК тарабынан козголгон кылмыш ишинин алкагында, ошондой эле жүргүзүлгөн тинтүү иш-чараларынын натыйжасында Бангладеш жарандарынын уруксат берүү мөөнөтү өтүп кеткен 120дан ашык паспорту, ошондой эле жасалма документтердин электрондук көчүрмөлөрү сакталган ноутбук табылган.

Учурда аталган чет өлкөлүк жаран камакка алынып, бул кылмышка тиешеси бар башка адамдарды аныктоо боюнча кошумча тергөө иш-чаралары жүргүзүлүүдө.

УКМК бардык чет өлкөлүктөрдү жана уюмдарды кабыл алынган жаңы миграциялык эрежелердин алкагында тиешелүү уруксат кагаздарын алуу маселелери боюнча Кыргызстандын Тышкы иштер министрлигинин электрондук порталына гана кайрылууга чакырат.