УКМК эл аралык трансулуттук баңги тобунун кылмыштуу ишмердигине бөгөт коюлду

Улуттук коопсуздук мамлекеттик комитети ыкчам-издөө иш-чараларынын натыйжасында эл аралык трансулуттук баңгизат тобунун кылмыштуу ишмердигине бөгөт койду. Бул тууралуу атайын кызматтан билдиришти.

УКМК 2025-жылдын башынан бери баңгизаттарды өндүрүүгө жана жайылтууга каршы күрөшүү боюнча пландык иш-чаралардын алкагында синтетиканы өзгөчө ири өлчөмдө сатууга бөгөт койду.

Ошентип, мыйзамсыз жүгүртүүдөн 44 кг 420 гр синтетикалык баңгизат алынып, Кыргызстандын 7 жараны кармалып, 3 нарколаборатория аныкталды.

Кармалган баңгизаттардын базар баасы 266 млн 520 миң сомду, башкача айтканда 3 млн долларыды түзөт (бул заттын 1 гр 6000 сом).

Буга байланыштуу УКМК менчигинин түрүнө карабастан жарандарды жана уюмдарды баңгизатка байланышкан кылмыштардын алдын алуу максатында жаштар менен түшүндүрүү иштерин активдүү жүргүзүүгө чакырат.

Эске салсак, баңгизат каражаттарды, психотроптук заттарды же алардын аналогдорун мыйзамсыз сатып алуу, сактоо, ташуу, даярдоо же жөнөтүү боюнча КР Кылмыш-жаза кодексинин 282-беренесине ылайык, кылмыш жоопкерчилигине тартылат жана мүлкүн конфискациялоо менен 5 жылдан 15 жылга чейин эркинен ажыратуу менен жазаланат.