Токтогул ГЭСинин №3 гидроагрегатын реконструкциялоо иштерин франциялык компания жүргүзүүдө
Токтогул ГЭСинин №3 гидроагрегатын реконструкциялоо иштери кызуу жүрүүдө. Бул тууралуу Энергетика министрлигинен билдиришти.
Гидроагрегатты алмаштыруу иштеринин башталганына 13 күн болду. Бул аралыкта жумушчу топ пландын негизинде, графикке ылайык өз ишин так аткарууда.
Гидроагрегат 2025-жылдын 20-февралында эксплуатациядан чыгарылып, жабдуулардын негизги түйүндөрүн демонтаждоо жана модернизациялоо иштери жүргүзүлө баштаган. Келишимдин негизинде реконструкция жана жаңылоо долбоорун Франциянын GE Hydro компаниясы ишке ашырууда.
Азыркы учурда негизги демонтаждоо иштери аяктады. Генератордун жана турбинанын тетиктери алынып, муздатуу жана май менен камсыздоо системалары ажыратылды.
Буга катар көмөкчү системаларды модернизациялоо иштери жүрүп жатат:
- түтүктөрдү алмаштыруу жана ширетүү иштери жүргүзүлүүдө;
- электр жабдуулары жаңыланып, жаңы кабелдик лотоктор орнотулууда;
- демонтаждалган элементтер диагностика жана алмаштыруу үчүн кампага жөнөтүлөт.
Реконструкция иштери аяктагандан кийин “Токтогул” ГЭСинин кубаттуулугу дагы 60 МВтка көбөйөт. ГЭСтин бардык 4 гидроагрегатын алмаштыруу менен реконструкция долбоору толугу менен аяктап, 2025-жылы станциянын кубаттуулугу 1440 МВт түзөт. Кошумча 240 МВТ кубаттуулук кошулат.
