Тоң суусунун деңгээли көтөрүлүп, 160 адам жакынкы айылдарга эвакуацияланды
Тоңдогу Зындан көлү жырылып, суу каптоо коркунучу жаралгандыктан жергиликтүү тургундар эвакуцияланды. Бул тууралуу Өзгөчө кырдаалдар министрлигинен билдиришти.
Маалыматка караганда, бүгүн Ысык-Көл облусунун Тоң районунун Туура-Суу айылындагы Тоң суусунун деңгээли көтөрүлгөн.
Буга байланыштуу Туура-Суу айылынын 90 жашоочусу жана Балык завод тилкесинен 70 адам жакынкы Эшперов жана Ак-Сай айылдарына көчүрүлдү.
Учурда куткаруучулар жеринде тактоо, көзөмөлдөө иштерин жүргүзүп, жергиликтүү бийликтин техникалары менен суунун нугун буруу иштери жасалууда.
Б.Мамбетов жана Күн-Чыгыш айыл аймактарынан 2 экскаватор, 3 жүктөгүч тартылып, Туура-Суу айылын суу каптоо коркунучунан алдын алуу иш-чаралары жүргүзүлүүдө.
