Түрк ишкерлерине Кыргызстандагы инвестициялык мүмкүнчүлүктөр тууралуу маалымат берилди
Күн мурун Кыргызстандын элчиси Руслан Казакбаев Түркиянын Жаш ишканалар жана башкармалыктар ассоциациясынын төрагасы Незих Аллыоглу менен жолукту.
Тышкы иштер министрлигинен билдиришкендей, жолугушууга ассоциациянын өндүрүш, туризм, медицина, илимий изилдөө жана эл аралык соода тармагындагы өкүлдөрү дагы катышты.
Жолугушуунун жүрүшүндө соода-экономикалык кызматташуу, Кыргызстанга инвестиция тартуу маселелери жана Кыргыз Республикасынын аймагында товарлардын ар кандай түрлөрүн өндүрүү боюнча биргелешкен ишканаларды түзүүнүн келечеги талкууланды.
Элчи Казакбаев бизнес чөйрөсүнүн өкүлдөрүнө президент Садыр Жапаровдун жетекчилиги астында Кыргызстанда жүргүзүлүп жаткан саясий жана экономикалык реформалар тууралуу кеңири маалымат берди.
Ассоциациянын мүчөлөрүнө Кыргызстандын экономикасынын түрдүү тармактарындагы инвестициялык мүмкүнчүлүктөр боюнча презентация көрсөтүлүп, гидроэнергетика жана энергиянын кайра жаралуучу булактары, тоо-кен, өндүрүш жана соода тармагындагы артыкчылыктуу долбоорлор боюнча маалымат берилди.
Жолугушуунун жыйынтыгында инвестиция тартуу боюнча потенциалдуу долбоорлорду изилдөө жана кызматташтыкты түзүү максатында Түркиянын бизнес делегациясынын Кыргызстанга сапарын уюштуруу боюнча макулдашууларга жетишилди.
Маалымат үчүн: Түркиянын Жаш ишканалардын жана башкармалыктардын ассоциациясына 40 миңден ашык адамды иш менен камсыз кылган 1300гө жакын ар кандай ишканалар жана компаниялар кирет. Түркиянын бардык аймактарында, Анкара, Измир, Бурса, Корум, Конья сыяктуу шаарларда филиалдары жана чет элдик өкүлчүлүктөрү бар.
