Сот тутумунун ачыктыгын камсыздап, ишине баа берүү үчүн 72 сот имаратына QR-код орнотулду
Сот системасынын ачык-айкындуулугун жогорулатуу, соттордун ишмердүүлүгүн баалоо максатында республика боюнча 72 соттун имараттарына атайын QR-коддор орнотулуп, иштеп баштады. Бул тууралуу Жогорку сотко караштуу сот департаментинин алдындагы “Адилет сот” мамлекеттик ишкана-мекемесинин директору Бек Иманалиев Кыргыз Республикасынын судьяларынын ХIII курултайында билдирди.
Анын айтымында, QR-код аркылуу берилген суроолорго жооп берип, жаран сот тармагындагы бардык иш-аракеттерге, сот кызматкерлеринин мамилесине, соттордогу түзүлгөн шарттарга карата өз пикирин билдире алат.
“Бүгүнкү күндө сот бийлигинде санариптештирүү боюнча алгылыктуу иштер жүргүзүлүп жатат. Сотторду тандоо үчүн жасалма интелектти колдонуу менен адамдык факторлорсуз ишке ашырылуучу жаңы система иштелип чыгууда. Сот тутумунун ишин автоматташтырылган система аныктайт. Сот тармагындагы бардык кагаз жүгүртүүлөр “Инфодокс” электрондук документ жүгүртүү системасына кошулууда”, – деди Бек Иманалиев.
Сот адилеттүүлүгүнүн сапатын жогорулатуу негизги максат экенин бирок, коомчулук бул өзгөрүүлөрдү кандай кабыл алып жатканын билүү үчүн бардык сот имараттарына QR-коддор камтылган маалыматтык такталар орнотулгандыгын Жогорку соттун төрагасы Медербек Сатыев судьялардын курултайында да белгилеп өттү.
“QR-код аркылуу жарандар сот тутумунун жалпы ишине карата пикирлерин калтыра алышат. Бул механизм бир нече маанилүү милдеттерди аткарат. Сот ишмердүүлүгүнүн ачыктыгын камсыздайт. Жарандарга соттук териштирүүлөр, судьялардын кесипкөйлүгү жана чечимдердин адилеттүүлүгү боюнча өз ойлорун билдирүүгө мүмкүнчүлүк берет. Бизге кемчиликтерди өз убагында аныктап, аларды жоюу боюнча чара көрүүгө жардам берет. Сот системасына болгон ишенимди арттырат”, – дейт Медербек Сатыев.
Белгилей кетсек, QR-код аркылуу пикир билдирүү, соттордун ишине баа берүү жашыруун түрдө жүргүзүлгөндүктөн, ким жазгандыгы аныкталбайт.
