Садыр Жапаров Кембридж программасы боюнча окуткан мектепти көрүп чыкты
Кыргыз Республикасынын Президенти Садыр Жапаров бүгүн,30-августта, Жалал-Абад облусуна болгон жумуш сапарынын алкагында Кембридждин эл аралык программасы боюнча окуткан мектепти көрүп чыкты.
Бул Жалал-Абад шаарындагы 670 окуучуга ылайыкталган заманбап эл аралык билим берүү борбору. Алар робототехника, илимий лабораториялар, маалыматтык-коммуникациялык технологиялар жаатындагы долбоорлор, карапа жасоо,аспаптык музыка, футбол, баскетбол жана социалдык долбоорлорду кошо алганда, ийримдердин жана секциялардын көп түрүнө катыша алышат.
Мамлекет башчысына мектепте эл аралык окутуучулар курамы иштей турганы тууралуу маалымат берилди. Мугалимдер жыл сайын квалификациясын жогорулатышат, ал эми окуучулар жеке коштоо алышат жана англис тилдүү чөйрөгө тартылышат.
Андан ары Президент Садыр Жапаров жаңы окуу жайдын шарттары менен таанышып, заманбап кабинеттерди, лабораторияларды, воркаут аянтчасын көрүп чыкты.
