Президент унааларды милдеттүү түрдө техникалык кароодон өткөрүүнү киргизүүгө каршы
Президенти Садыр Жапаров автоунааларды милдеттүү түрдө техникалык кароодон өткөрүүнү киргизүү сунушуна каршы, деп жазды президенттин басма сөз катчысы Аскат Алагөзов социалдык тармактагы баракчасына.
Анын айтымында, бул демилгени мамлекет башчысы төмөнкү жүйөөлөрдүн негизинде колдобойт.
Учурда өлкөдөгү эски унаалардын саны азайган. Такси кызматын көрсөткөндөр автоунааларынын техникалык абалы жакшы болушуна биринчи кезекте өздөрү кызыкдар. Эң башкысы, милдеттүү түрдө техникалык кароону киргизүү бул функцияны өзүнө алган органда коррупциялык тобокелдиктерге жол ачышы ыктымалдыгы жогору.
Жогорудагыларды эске алуу менен президент Садыр Жапаров техкароону кайра киргизүүнү караган мыйзам долбоорун коомдук талкуудан алып коюу сунушун берди.
