Президент: Окуучуларыбыздын мыкты окуп чыгышы үчүн оболу мектептердеги абалды: эскилерин жаңыртып, кошумча имаратка муктаждарына жаңы корпустарды салып берип оңдоп жатабыз
“Айыл болобу, шаар болобу окуучуларыбыздын мыкты окуп чыгышы үчүн оболу мектептердеги абалды: эскилерин жаңыртып, кошумча имаратка муктаждарына жаңы корпустарды салып берип оңдоп жатабыз”, – деп билдирди Кыргыз Республикасынын Президенти Садыр Жапаров бүгүн, 30-августта, Жалал-Абад облусуна болгон жумушчу сапарынын алкагында Сузак районунун Барпы айылындагы Н. Алыкулов атындагы мектептин жаңы имаратынын ачылыш аземинде.
Мамлекет башчысынын сөзү:
“Урматтуу сузактык агайын-туугандар!
Билим уясынын устаттары – урматтуу агай-эжейлер!
Бүгүнкү салтанаттын ардактуу меймандары!
Бүгүн биз Миң-Өрүк айылынын келечек муундары үчүн өтө маанилүү деп эсептелген билим уясынын – Нышанбай Алыкулов атындагы мектебинин жаңы имаратынын ачылыш аземинде чогулуп, кубанып турабыз.
Катардагы бир айылдын мектебинин ачылышына кубануунун кандай себеби бар? Себеби мындай: “Ааламга кетчү жол айылдан башталат” деген таамай айтылган кептегидей, миң-өрүктүктөрдүн “ааламга кетчү жолу” мына ушул мектептен, мектептеги билим берүүдөн башталат.
Андыктан, алгач сиздерди бүгүнкү кубанычтуу күнүңүздөр менен, жаңы билим уясынын ачылышы менен чын дилимден куттуктаймын!
Бүгүнкү иш-чаранын урматтуу катышуучулары!
Билим уясында таалим-тарбия, татыктуу билим алуу андагы тиешелүү шарттардан көз каранды. Бул мектептин имаратынын тарых-таржымалына көз чаптырсам, башында колхоздун имараты болуп курулуп, андан кийин далай жылдарды арытып, дубалдарынан жаракалар кетип, жараксыз абалга келген экен. Ошентсе, бул мектептен элибиздин бир ууч топурагына жараган эр-азаматтар окуп чыгышкан.
Азыркы заманда биз баарынан мурун келечек муундарга кам көрүшүбүз керек. Айыл болобу, шаар болобу окуучуларыбыздын мыкты окуп чыгышы үчүн оболу мектептердеги абалды: эскилерин жаңыртып, кошумча имаратка муктаждарына жаңы корпустарды салып берип оңдоп жатабыз. Мына ошондой камкордук Нышанбай Алыкулов атындагы мектепке дагы көрсөтүлдү. Мектептин жаңы имараты заман талабына ылайык курулуп, анда балдардын билим алуусуна толук шарттар түзүлгөн.
Урматтуу мекендештер!
Мында интеллигенциянын башатында турган агай-эжейлерибизге, жергиликтүү элге маалымат иретинде билим берүү системасындагы айрым жаңылыктар менен бөлүшө кетейин.
Азыр дүйнө тынымсыз, күн сайын өзгөрүү жолунда. Дүйнөдө технологиялар укмуштуудай ылдамдыкта өнүгүп жатканын баарыбыз көрүп-билип жатабыз. Ошондуктан дүйнө агымынан артта калбай, эң оболу билим берүүнүн түзүмү гана эмес, мазмуну да өзгөртүүгө бел байладык. 12 жылдык билим берүү системасына 150дөн ашуу өлкө өтүптүр. Демек, натыйжалуу система. Биз дагы бул системаны дыкат иликтеп, өзүбүзгө ыңгайлаштыруу менен дүйнө баскан жолго багыт алышыбыз керек.
Ал эми билим берүү системасын ар тараптуу өзгөртүүгө, билим берүүнүн сапатын жогорулатууга жана алдыңкы билим берүү технологияларын киргизүүгө багытталган улуттук «Алтын Казык» программасы тууралуу кабарыңыздар бар деп ойлойм.
Ошентип, жаңы окуу жылына карата 12 жылдык билим берүүгө өтүү боюнча концепциясы, билим берүүнүн жаңы стандарты бекитилип, предметтик стандарттар жана окуу программалары жаңыланды.
Билим берүүнү санариптештирүү багытында компьютердик техникалар сатып алынып, 27 миңден ашык ноутбук даярдалып, мугалимдерге таратылып берилди.
Жакынкы окуу жылына карата математика, табият таануу жана англис тили боюнча жаңы окуу китептери даярдалып жатат. Бул — сапаттуу билимдин негизги куралы болгон китеп маселесин чечүүгө багытталган олуттуу кадам болуп саналат.
Мындан сырткары, кечээ эгемендигибиздин 34 жылдыгына карата 100 социалдык обьектини, анын ичинде билим берүү мекемелерин ачып, пайдаланууга бердик. Мунун баары эл агартуу жаатындагы иш-аракетибиз.
Ошентип, быйылкы окуу жылында билим берүү системасында өлкөбүздө чоң тарыхый өзгөрүү болгону турат. Дүйнөлүк агымдан калбайлы деген демилгелердин ишке ашуусу мугалимдердин жигердүү иш-аракеттеринен түздөн-түз көз каранды экенин баса белгилеп кетейин. Мында мугалимдердин орду эбегейсиз зор болору талашсыз. Көз майын коротуп, бүткүл дитин балдарга бурган мугалимдерибиздин эмгегин баалоого милдеттүүбүз. Быйыл эмгек акыңыздарды дагы көтөрөбүз. Биз сиздердин маянаңыздарды заман талабына ылайыктоонун аракетиндебиз.
Ошол эле маалда келечек муунга тарбия, билим берүү маселесин бир гана мектепке жүктөп койбошубуз керек. Ата-энелердин жоопкерчилиги бийик экенин ата-энелер өздөрү сезиши зарыл. Өздөрү да үлгүлүү, билимдүү, маданияттуу болушу өтө маанилүү.
Бүгүнкү жакшынакай саамалыктын ээлери – урматтуу агай-эжейлер, кымбаттуу окуучулар!
Мынакей мамлекетибиздин билим берүү системасындагы бурулуштуу мезгилде жаркыраган жаңы мектептүү болуп жатасыздар. Мектеп — бул билимдин башаты, адамдык нарктын түптөлгөн жайы. Ал мамлекеттин эртеңки күнүн аныктап, келечектин пайдубалын түптөгөн касиеттүү очок болуп эсептелет.
Буюрса, жаңы мектепте, жаңы система менен кийинки муунга терең билим бересиздер деп үмүт артам. Ошону менен бирге ата-бабаларыбыздан калган нарк-насилди, улуттук баалуулуктарыбызды балдарыбыздын көкүрөгүнө уютуп, мекенчил атуулдарды чыгарасыздар деп бекем ишенем.
Сиздердин жаркыраган мектебиңерден мамлекетибиздин социалдык-экономикалык өнүгүшүнө салымын кошкон, эл үчүн кызмат кылган мыкты инсандар чыксын!
Окуучуларыбыз оргуштаган билимге, улуттук дем-күчкө тунсун!
Жалпы мугалимдер жамаатына албан-албан ийгиликтерди каалайм!
Жаңы мектептин багыт алган жолу байсалдуу болсун!”
