Ош шаарындагы Улуу Ата Мекендик согуштун жана оруктун ардагерлери сыйланды
Ош шаарынын мэри Бакытбек Жетигенов Улуу Ата Мекендик согуштун ардагери Касымбай Жолдошовдон кабар алып, Жеңиштин 79 жылдыгы менен куттуктады.
Ошондой эле мэр КР Президентинин атынан 100 миң сом жана Ош шаарынын мэриясынын акчалай сыйлык, белектерди тапшырды. Шаар башчысы Улуу Ата Мекендик согуштун ардагерлерине жана оруктун эмгекчилерине ар дайым өзгөчө көңүл бурулуп, керектүү бардык жардамдар берилерин айтты.
Согуш ардагерине ден соолук жана бакубатчылык тилеп, дайыма мэрия тараптан камкордук көрсөтүлөрүн билдирди.
Айта кетсек, Касымбай Жолдошов 99 жашта, учурда Ош шаарындагы жалгыз согуш ардагери.
Мындан тышкары шаар мэринин орун басарлары, мэриянын кызматкерлери жана муниципалдык кызматтардын жетекчилери оруктун ардагерлеринен кабар алышып, материалдык жардамдарды көрсөтүштү.
Белгилей кетсек, учурда Ош шаарында 1 согуштун ардагери жана 5 ооруктун эмгекчилери жашайт.
