Оңдоодон кийин “Манас” аэропорту нөлдүк көрүнүүдө дагы каттамдарды кабыл ала баштайт

“Манас” эл аралык аэропорту нөлдүк көрүнүүдө да каттамдарды кабыл алууну камсыз кыла турган атайын жабдуулар менен жабдылууда. Бул тууралуу “Кыргызстан аэропорттору” ААКтын Инфратүзүмдүк жана аймактык өнүктүрүү боюнча директору Алтынбек Мамбетов “Биринчи радионун” эфиринде билдирди.

Анын айтымында, нөлдүк көрүнүүдө, туманда, атайын жабдууларсыз аэропорттордо учуу мүмкүн эмес, анткени бул кагылышуу коркунучунан жана багыт алуунун жоктугунан улам өтө кооптуу. Мындай шарттарда конуу үчүн жогорку тактыктагы автоматтык конуу системалары талап кылынат, бирок алар менен бардык аэропорттор жана учактар жабдылган эмес.

Ал белгилегендей, аэропорттор категориялар боюнча үчкө бөлүнөт.

“Биз экинчи категорияда болгондуктан, аба ырайынын начардыгынан улам каттамдарды токтотууга же кармоого аргасыз болчубуз, анткени жүргүнчүлөрдүн жана экипаждын коопсуздугу биринчи орунда турат. Жакында биз үчүнчү категорияга жетебиз, ошондо аба ырайы начарлаганда, туманда, нөлдүк көрүнүүдө да бизге учактар келе алат. Биз учуу-конуу тилкесин нөлдүк көрүнүүдө да каттамдарды кабыл алууга мүмкүндүк берген алдыңкы жабдуулар менен жабдып жатабыз. Декабрга чейин бардык монтаждык иштер бүтүп, экинчи категориядан үчүнчүгө өтөбүз деп үмүттөнөбүз”, — деди ал.

Булак “Кабар” агенттиги