МинКабдын кезектеги жыйынында бир катар маанилүү чечимдер кабыл алынып, мамлекеттик органдардын жетекчилерине тапшырмалар берилди
Кыргыз Республикасынын Министрлер Кабинетинин Төрагасы – Кыргыз Республикасынын Президентинин Администрациясынын Жетекчиси Акылбек Жапаров Кыргыз Республикасынын Министрлер Кабинетинин кезектеги жыйынын өткөрдү.
Министрлер Кабинетинин мүчөлөрү 20 маселени карашты, алардын көбү колдонуудагы ченемдик укуктук актыларга өзгөртүүлөрдү киргизүүгө багытталды.
Кабыл алынган чечимдердин бири Кыргыз Республикасынын Билим берүү жана илим министрлигинин баштапкы жана орто кесиптик билим берүүнүн мамлекеттик билим берүү уюмдарын жана Кыргыз Республикасынын кесиптик жогорку билим берүү уюмдарын каржылоо тартиби жөнүндө маселе болду.
Мындан тышкары, жыйында 2024-жылга карата мамлекеттик-жеке өнөктөштүк долбоорлорун ишке ашыруу планы бекитилди. Планда ишмердүүлүктүн ар кандай тармактарындагы 40 долбоор камтылган.
МинКабдын мүчөлөрү бир добуштан Министрлер Кабинетинин 2022-жылдын 28-январындагы № 32 “Инвесторлордун даттанууларын кароо жана аларды колдоо тартибин бекитүү жөнүндө” Кыргыз Республикасынын Министрлер Кабинетинин токтомуна өзгөртүүлөрдү киргизүү тууралуу” токтомунун долбоорун колдошту.
Чечим мамлекеттик органдар жана жергиликтүү өз алдынча башкаруу органдары менен өз ара аракеттенүүдө пайда болгон пикир келишпестиктерди чечүүдө инвесторлорго жардам көрсөтүү жана колдоо көрсөтүү механизмин өркүндөтүүгө багытталган.
Ошондой эле, Министрлер Кабинетинин жыйынында МинКаб Төрагасы мамлекеттик органдардын жетекчилерине бир катар тапшырмаларды берди, тактап айтканда, Санариптик өнүктүрүү министри Нурия Кутнаевага борбор калаанын автобекеттеринде калкты тейлөөнүн көчмө борборлорун уюштуруу боюнча, министрликтердин тиешелүү жетекчилерине – лыжа кластерин ишке ашыруунун долбоорун Министрлер Кабинетинин кезектеги жыйынына киргизүүнү, ал эми Кыргыз Республикасынын Министрлер Кабинетине караштуу Архитектура, курулуш жана турак жай-коммуналдык чарба мамлекеттик агенттигинин директору Нурдан Орунтаевге курулуп жаткан көп кабаттуу турак жайлардын биринчи кабаттарына бала бакчаларды уюштуруу мүмкүнчүлүгүн кароону тапшырды.
