МинКаб башчысы Гонконгдун администрациясынын башчысы Жон Ли менен сүйлөшүүлөрдү өткөрдү

Кыргыз Республикасынын Министрлер Кабинетинин Төрагасы – Президенттин Администрациясынын Жетекчиси Адылбек Касымалиев Кытай Эл Республикасынын Гонконг өзгөчө административдик районуна (Гонконг ӨАР) жумушчу сапарынын алкагында Гонконгдун администрациясынын башчысы Жон Ли менен сүйлөшүүлөрдү өткөрдү.

Кыргыз делегациясынын башчысы белгилегендей, Кыргыз Республикасы экономикалык өсүш, бюджеттин киреше бөлүгүнүн өсүшү, социалдык төлөмдөрдүн көбөйүшү жана калктын жан башына ИДПнын эки эседен ашык өсүшү менен мүнөздөлгөн туруктуу прогрессивдүү өнүгүүнү көрсөтүп жатат.

«Кыргызстан Борбордук Азиядагы транспорттук-финансылык хаб катары позициясын бекемдөөгө умтулуп, капиталдык инвестицияларды, анын ичинде Кытайдын Гонконгунан жигердүү тартууну көздөйт», – деди МинКаб башчысы.

Тараптар Кытай Эл Республикасынын Гонконг ӨАР аймагында Кыргыз Республикасынын баалуу кагаздарын чыгаруу боюнча кызматташуунун келечегин талкуулашты.

Министрлер Кабинетинин Төрагасы Кыргызстандын жарандары үчүн визалык режимди жөнөкөйлөтүү маселесин көтөрдү.

Мындан тышкары, билим берүү тармагындагы кызматташтыкты өнүктүрүүгө, анын ичинде студенттерди алмашуу программаларына жана эки тараптын билим берүү мекемелеринин ортосунда түз байланыштарды түзүүгө жана Кыргызстандан келген студенттерге Гонконгдун ЖОЖдорунда билим алуу үчүн квоталык орундарды бөлүштүрүүгө кызыкдарлык билдирилди.

Жон Ли өз кезегинде КЭРдин Гонконг ӨАР Кыргызстандын кызматташуунун горизонтторун кеңейтүү каалоосун колдой турганын билдирди жана каржы тармагында кызматташуунун келечегин белгиледи.